Plan De Brink
Klik hier om de 3D animatie te bekijken

Column het Zwarte Schoap

Het was röstig in Battum

Iedereene bleef thuus, behalve de vaderlandse pers. Zie kwammen met groot materiaal, um te kieken of ter nog oaverlevenden waren. Gelukkig völ det nog wal met. Battem hef het goeie veurbeeld gegeven en noe dut heel Nederland ons nao. Nuchter boerenverstand, zôl doar dan toch gebrek an weazen in Den Haag? As det zo is kump de oplossing volgend veurjoar met de verkiezingen. Onzen wethoolder, Erik Stegink, geet in de landelijke politiek veur ne nieje partieje, Boeren Burger Beweging.

Lees verder

’t zwarte Schoap

Achterop bie Johanna F. van Buren

In november 1938 fietst zie noar een old darpkse in Salland. De trein stopt er neet meer. Zie geniet van de röste in det pleitske, zo veer van de grote weg. In det darp stoat nog mooie huuskes an paadjes, deepe in t greun, diet allemoal op de eeuwenolde karke angoat. Zie veult er zich drek eigen en trekt er ne dag vuur uut um is een eindje rond te fietsen. Meerdere keren geet ze oaver de Schipbekke. Het lik ter op det ze oaver Loo weer terugge kump. Woar zol ze gestoane hebben, zie hef het oaver de Bekke, diet dan weer breed is en dan weer smal. Het Marsmansvonder of de Arkelsteinse of Landweersbrugge, het maakt neet uut. Mooie bruggetjes, deepe in t greun, met ne weelderigen begreuiden bekkenwal, woet de endjes spettert in het voedselrieke water. Zie geet langs nen hoogen Enk en zut het golvende jonkgreun in de leegte. Deepe onder indruk geet ze nog is weer rond um de karke. Zie geniet van de röste en zoch noar de bakker, den zo bekend is van zien ne Battemse moppen. Zie vindt ze zo lekker, broen en bros. Zie löt ons in het ongewisse wat vun pleitske of het is, maar iedereene weet dat as ie kommende van Okkenbrook, bie de Olde Mölle recht duur goat, in ons mooie Battum komt. Inmiddels bint wie dikke tachtig joaren veerder. De wegen bint breder geworden. De meeste kleine paadjes in het Darp bint weg. De olde karke is ter nog, hooge verstopt achter de beume. Nog altied is doar ne bakker. De volgende keer as ik ter komme, zal ik is vroagen noar die bezundere Battemse moppen. Het is neet meer as in achtendartig, toch is ter nog völle bewaard gebleven. Noe met de kommende veranderingen op de Brink, hop ik det het Darpse bewaard blif en det de vreimden hier de röste preuft, diet in de jachterige wereld vaake zo veer te zeuken is. Net vuur de Mölle spring ik weer van de bagagedrager en geniete nog een tiedje noa van de schilderachtige wereld in de Apenhuuzen.

Oorlog um geleuf

Het is van alle tieden. Ook hier in onze contreien is ter völle gevochten en gemoord. In 1572, in het begin van den tachtig joarigen oorlog, begun dan misschien de victorie in Den Briel, in Zutphen hebt ze doar een hooge pries veur betaald. De zwoager van Willem van Oranje had in 1570 Zutphen in genömmen. Ziene suldoaten sleugen de beelden in de karken kapot. Kloosters gungen in vlammen op.

Lees verder

Vaderdag

Hoe mooi kan het weazen. Gelukkig het weer warkt met. Wie kunt buuten zitten. Netuurlijk alles op anderhalve meter. Het is zinvol zegt de notabelen. In Den Haag magt ze eerst neet demonstreren tegen de corona moatregelen en dan weer wel. Vanof Schiphol vleegt ze met koppels teglieke deur de douane op weg noar, ja zeg het maar. Noa de vakantie waaiert ze allemoal weer uut oaver het hele land. Wie hebt met al die corona toestanden al mennigen verjeurdag oaver esloane. De schrik zit er goed in. Het virus is ter nog altied, maar deur alle moatregelen, is het een eind terug gedrungen. Wat een toestand, maar het brach ons ook nieje inzichten. De lucht was in één keer völle schoner, de files waren vôt en de economie krump in mekaar. Het verdreet gung min of meer langs oen hen. Ie lazen het in de krante. Begraffenissen, allemoale in een kleine besloten kring. Condolaties waren in één keer niet meer meugelijk. Veur de allereerste keer hebt wie ne dienst veur nen overledene via het internet kunnen volgen. Doar woer der honderden hadden motten zitten was het noe een leuige ruumte met een man of twintig. Ie volgt het statische beeld in die holle zaal. Eaven denk ie dat ie der bie bint, mà dan wordt het beeld zwart en is de dienst veurbie. De nieje tied, in plaats van ne condolatie, nen erehaag in de stroate woer de gestorvene al zien leaven hef geleefd en gewoond. Indrukwekkend, moesstille, de leste ere, allemoal op anderhalve meter ofstand. Toch, loat wie hoppen det het leaven weer wordt as eerder. Doar bint de kinder met de vaderdagkedootjes. De slieters hebt het good gehad en opa kan weer een tiedje vedan. De bakpanne steet an. Het vleis knistert in het vet en iedereene geniet. Dan stoat er twee paar kinderoogen veur oe. “Opa magge wie oen ne knuffel geven?” Het meuiste kedoo veur vaderdag. Oen harte slöt ne slag oaver en ie weet weer wat het echte leaven is.

Het olde ambacht

De kleine jonge kon nargens hen spöllen. Hij was zô vedreetig en zo kwam opa an de buurte. Eerst een pötje voetballen, maar doar had e al rap genog van. Toen kwam maar zo het idee um de kleine man ne kattenpult te maken. Det wol hij wal, hij had met de vakantie in Frankriek hele mooien gezeene.

Lees verder

Adieu Achterhoek FM

Joarenlang zaten ze an de Wiersserbroekweg in Vorden. Völle mensen lusterden alle dagen noar de muzikale klanken, diet doar vedan kwammen. Zeker onder Loarne, maar ook vanuut Battem, Harfsen, Epse en Gorssel waren de verzoekjes op de zundagmorgen neet van de lôch. Onze senioren geniet, juust in disse tied, van de mooie, mederne en olde muziek.

Lees verder