Plan De Brink
Klik hier om de 3D animatie te bekijken

Achtbaane

Een betje grieperig begin ie an de wekke. Wat kan een mense toch allemoale beleaven. De temperatuur löp alsmaar op. Ôk de neuze blif lopen. Vieftien groaden, neet te geleuven. Toch as ie in de vrogte noar buuten kiekt lig het ies bevreuren op de weide. Buuten fietst de mensen, volop genietend van de vuurjoarszunne en binnen zit ie te kieken noar het schaatsen.
Zelf mocht ik genieten van een feestje vuur mensen met ne beparking. Ie vroagt oe of, of ter nog mensen bint zonder beparking. In Venezuela houwt ze mekaar as arme deers, umdet de grote leider neet wil det het volk te etten krig. Dan heb ie toch wal ne hele grote beperking. Heele stromen mensen op drift, op zeuk noar een betje etten. Op het feesje gung één persoon met ne beker op huus an umdet e de eerste pries had gewunnen. De best verkleede artiest. Zien geluk kon neet op. Zelf hadden wiej het geluk det de kleinkinder bleven logeren. Lekker ravotten um het huus hen. Dan eaven een rust momentje um te kieken noar de uutbundige bleui van de krokussen. Het wordt het helemoale stille. De beide krokussen ligt in bedde en oma nemt eur röste in het gemak. De andere morgen weer vroeg der uut. Die krokusjes bint snel uut gesloapen. Het feest begint weer. Met zien vieren in bedde, in de kelder is het donker. Opa en oma hebt de grootste schik. Dan moet er gebadderd worden. De enthousiaste kreten dringt deur tut in de wonkamer. Een uurtje later zit ze weer spik en span an de ontbijttoafel. De grötste schik, veural as opa veur James de Butler geet spöllen. De tied vlug veurbie en dan mag ie ze um twaalf uur weer ofleveren bie de rechtmatige olders. De kleine krokusjes bint al weer buuten an het ravotten as de oppasdienst op huus an geet op weg noar het volgende avontuur.