Bathmensekrant.nl is een uitgave van Artzet Media en heeft als doelstelling het dagelijks nieuws uit het verspreidingsgebied van de Bathmense Krant te brengen in de vorm van een online krant.

Battemse scheuipkes goat allemoale stemmen

Nog neet zo lange geleden was ter op de Battemse karmse nog ne echte schoapenmark. Jammer genog, deur regeltjes van disse nieje tied, is det niet meer. Gelukkig zeej’ in de buutengebieden nog wal is ne heele kudde lopen. Een mooi gezichte, die wollen bolletjes op die kaale weidens. Met de keulte van de ofgeloopen wekke zult ze noe wa binnen weazen.

De meeste scheuipkes bint vaal wit van kluur, maar zo of en toe löp ter ok wal eens ne zwatten tussen. Een zwart schoap, zo at ze der in meerdere femilies wal bint. Het mooie der van is det ze vaake opvalt en doarduur hebt wie iedere wekke weer wat te schrieven. Van de wekke kreeg de vrouwe, een oma an de deure. Het zwarte schoap zelf was ter niet. Zie kreeg een zwart scheuipke an geboden. Gewoon umdet er iedere wekke een verhaal in de krante steet, veur Battemse en andere lezers, onder schuulnaam van het zwarte schoap,. Een heel leef en mooi gebaar, maar ook een teken det de verhalen worden gelezen. Bedankt oma veur het breien van het schoap en de kleindochter, bedankt veur het goeie idee. Het scheuipke steet lekker warm bie de kachel en zal hoppelijk ne inspiratie weazen um nog völle verhaaltjes te maken. Meert is in het land, det betekent dit joar, dat wie meugt stemmen. Noe is het niet zo det wie ons altied as makke scheuipkes noar de slachtbanke moet loaten leiden. Wel hop ik det de Battummers, eigelijk iedereene, neet verget um op 21 meert ne stemme uut te brengen. Het is, zeker in disse tied, met allemoale nieje stromingen, belangriek um oene stemme te loaten heuren. Maakt van oen rech een plich.