Bathmensekrant.nl is een uitgave van Artzet Media en heeft als doelstelling het dagelijks nieuws uit het verspreidingsgebied van de Bathmense Krant te brengen in de vorm van een online krant.

De dagen wordt weer langer

Ie kunt het al weer good marken. Het blif langer lech. De Niejjoarsvisites bint veur een groot gedeelte achter de rugge. De Knooiers hebt de Battemse kwis neet gewunnen, maar toch ne mooie deirde plaatse. Alle eere gung noar Brannie. Zie kregen in de oavervolle zaal biej Boode, de eerste pries en de eeuwige roem oaver zich hen. Inmiddels bint de Battemers al weer drok met heele andere dinge. Ofgeloopen zundag kozen de Battemse Pompers hun nieje Prins Carnaval. Prins Jordi de Eerste en Adjudant Kamphuus bint veur de kommende tied de heersers oaver Pompersgat. Nog maar een wekke of wat en het carnavalsvirus weeit weer oaver het land. Veur dat ie der arg in hebt is het veurbie. Zol der nog winter kommen? Het zut er neet arg noar uut. Ja, zo of en touw ne natte schneebujje en een greuidje vorst, maar de Elfstedentocht kunt wie wal op onzen boek schrieven. Nee veur de echte schnee en winter moet ie noar de Alpenlanden. Heele darpen bint er of geslötten van de buutenwereld. Vakantiegangers moet met heilicopters worden ofgevoerd. Het lik allemoale heel mooi, maar het is neet te hoppen, dat wie hier de helfte an schnee en winter kriegt, want dan lig alles plat en verandert Holland in eene lange file. Het blif een betje vedan kwakkelen en det dut een mense verlangen noar het veurjoar. Een dinge steet as ne poal boaven water, det veurjoar kump ter an. Het kan mie neet snel genog goan, maar toch, ie moet genieten van iederen dag. As doar toch nog een paar winterse wekken tussen zit, dan nemme wie die op de koop toe. Allemoale genieten van de Olympische Winterspelen. Allemoale in de polonaise achter Prins Jordi en Adjudant Kamphuus an. Op noar het veurjoar.