Plan De Brink
Klik hier om de 3D animatie te bekijken

De Brink

Vuur mie heb ik een fotootje uut 1900 van de Oudheidkundige Kring uut Battem. De Brink, met links Boode en rechts Elferink. Ie komt er met an het denken, hoe klein of het allemoale was. De röste diet het uutstraalt. Midden joaren zestig sjeesden wie op onze Zündapp, Kreidler of Batavus noar de dansoamde bie Boode of Broakhekke.Doar was toen al heel wat veranderd, maar de boerderieje van Elferink stond er nog. De brommers parkeerden wie op den hook van wat noe de Veldkamplaan is. Doar stun nog ne losse schuure met ne barg. Eaven een kaartje kopen, as wie doar geld veur hadden. Mangs zoch ie op de grond noar een half gescheurd kaartje en leuten det veur de tweede keer ofscheuren. Ie mossen wal good uutkieken want de kastelein was ter scharp op. Mooie tieden, ne sobere zaal, in twee gedeeltes. Ne vaste plaatse argens in ne röstigen hook. Deerntjes in mooie kleedjes en ne pettycoat. Muziek, Las Cubanas of de Sensation Rockets. Netuurlijk gunge wie ook brommers kieken, die hadden wie doar tenslotte neet vuur niks neer gezet. Neet te vergetten, noa het dansen eaven an bie Hendrik van de Bakker. Hij straald’n de röste uut, at e oe met die groote hande, ne buul petat presenteerden. As ie noe oaver de Brink goat is ter völle veranderd. Toch straalt het nog altied röste uut. De röste die we in disse jachterige tied zô neudig hebt. De bakkerieje van Niekamp, met veerderop den greunen Brink met Boode as achtergrond. Ech woar, noa een rondje um de karke, kôm ie as een ander mense wier in de buutenwereld. Ie möt er neet an denken det er drastische veranderingen komt. Ne mooien greunen Brink, met doarumme hen de verschillende cafeetjes en ettenten. De ôôle pandjes blieft er zuunig op, ie zeet rechtervoort al genog van die grote betondeuzen.