Een joar der bie

Det oaverkump ons allemoale en doar mag ie dan dankbaar vuur weazen. Eaven de beide kleintjes ophalen uut de schoole. Een half uur later zit e wie gezamenlijk an het gebak met kinderzeute. Ja kinderzeute, het besteet nog, vroag mar is bie de slieterieje. Netuurlijk drinkt opa een glèèske met.De kindereugjes gleuit, zie vindt het onmeunig lekker en opa, onmeunig zeute. Onwillekuurig goat de gedachten trugge in de tied. Opoe schunk ons, net as de groote keerls, een borreltje in. Ie slobbern het in één keer noar binnen. Het kind in mien was wakker en wie proosten met mekaare op wier een joar der bie. De dag kon net meer kapot. Netuurlijk worden ik oavergooit met kedootjes, van ne kokwekker van de vrouwe tut en met een matje vuur de kneene, van de Welkoop. Het verjeuirdagsfeesje zit er inmiddels weer op. De eersten arriveerden um zes uur en de lesten teegen een uur of neenge. Maar ja, die mossen helemoale uut het Holtense kommen. Het worden nen helen zit, maar wie weet wier wiet er ziek is en wiet er allemoale uut mekaare goat. Netuurlijk vertelle wie det niet veerder, want dan is ter helemoal gen niejs meer in Battem. ’S oavonds laate worden de kleintjes uut bedde haalt. Zie kreegen de schoone netjes an. Noh ja netjes, de linker schoon an de rechter voot en aansumme. Volgens vaa had de jonge het verkeerde been an eheulen. Gelukkig had het manneke het zelf rap in de gaten en lag de hele kamer dubbel van het lachen en vaa, vaa genöt volop van zien whiskietje. Verjeurdagen, altied fijn um de femilie bie mekaar te hebben. Blieft er van genieten want vuur dat ie der arg in hebt tel ie weer een joar der bie.