Bathmensekrant.nl is een uitgave van Artzet Media en heeft als doelstelling het dagelijks nieuws uit het verspreidingsgebied van de Bathmense Krant te brengen in de vorm van een online krant.

En de hette duurt maar vedan

De vakanties bint begunnen. Inmiddels bint de buren vertrokken. Zie goat gen twei wekke maar vier moanden. Alle daage stuurt ze ons een berichtje en doardeur maak ik mie bes wal zorgen. Ik bin bange det ze deepe christelijk weer komt. Op zich niet verkeerd heur, maar in die anderhalve wekke det ze noe onderweg bint, hebt ze volgens mien al meer karken van binnen e zeene as in eur heele leaven.Deepe onder de indruk bint ze en zie bint nog maar bie Moskou en det met disse hette. Zie hebt het glas nog lange neet half leuig en komt hoe langer hoe veerder van huus. Det geeldt niet veur de Duutsers. Ok niet verkeerd, zie vund’n disse keer al noa twei wekke eur Waterloo in Rusland. Dan de leu uut het Venne. Die hebt net Half Niejoarsdag achter de rugge. Veur de eerste keer hebt ze met de heele buurte een drankje enommen op den eersten juli. Heelemoale niet verkeerd. Zôl het de hette weazen? Mooi dichte bie huus, ne rondvaart oaver de Schipbekke. Gen wonder det ze doar een vaste gewoonte van wilt maken. Het glas half vol of half leuig, de koelte van de Bekke, genieten van het mooie weer en proosten op de tweede helfte van het joar. De hette duurt maar vedan. As ie oen tuintje nog een betje greun wilt holden, moet ie noe sproeien, want binnen de kortste keren is ter een sproeiverbod. Ie moet zuunig an doon met water. De brouwerieen, limonadefabrikanten en ijsmakers dreeit oaveruren want met disse hette moet zie zorgen dat de leu niet an de kok komt. Zelf bin ik blie det mien glas half vol is. Lekker in de luwte, in de schaduw van de brandende zunne, hoe lange nog?