Bathmensekrant.nl is een uitgave van Artzet Media en heeft als doelstelling het dagelijks nieuws uit het verspreidingsgebied van de Bathmense Krant te brengen in de vorm van een online krant.

En het was zô gezellig

Moandagmorgen, Battumse Karmse. Tegen een uur of elme wandele wie noar binnen. Het Cultuurhuus zit vol. Zo vol was het nog nooit. Het is ter gezellig en wat ne hoop bekenden. Gelukkig steet de knop van de muziek neet zo keihard. Ie kunt ook nog met mekaar proaten en nog mooier, ie wordt er keurig bedeend en drinkt nog uut een ech glas.Wat wil een mense nog meer. Een hapje? Het is ter. De mensen bint eaven weg uut de dagelijkse sleur. Rot, rot, rot sind die Rosen, de zaal deint met op de tonen van de muziek. Een paar dames van de KLM loopt deur de zaal. Hef det wat te maken met de Battumse kwis? Het zal wal. Eaven later geet de halve zaal in de polonaise um te eindigen met het Sierra Madre. Teegen een uur of twaalme goat een antal bezeukers al op huus an. Vermoedelijk moet ze op tied weazen veur het middagmoal. De gezelligheid wordt er niet minder umme. Maar dan in één keer, tegen eenen, is het gebeurd. De zaal geet dichte, zie scheidt er met uut. Wat jammer en woerumme? Zo’n treffen veur senioren kan met de karmse toch bes vedan goan tut een uur of vieve. Doar hef toch gen mense las van. De keuze um te blieven of te goan kunt ze ech zelf wal maken en ne karbonade of een bal gehakt kunt ze in het Cultuurhuus toch ook wal trechte maken? Ne gemiste kans, maar misschien een idee veur de volgende karmse. Gezien de vergriezing, een gat in de markt. Veerder niks anders as komplimenten veur de muziekkeerl en de bediening. De ofsluuting met het Sallandlied leut nog eens wier zeen hoe greuts of wie bint op onze eigen streek, Salland, Salland, hier is mien stea.