Bathmensekrant.nl is een uitgave van Artzet Media en heeft als doelstelling het dagelijks nieuws uit het verspreidingsgebied van de Bathmense Krant te brengen in de vorm van een online krant.

Het skiw in de karsenboom

Ie zeet het neet meer. Zun skiw stelden ook niet zo völle veur. Een old oaverhemd met een stuk strootouw op een kruus van bonenstökke en det gung dan hooge in de boom. Der umme hen nog een stuk of wat van die zilverpepieren slingers, diet lawaai maakten in de wind. Het was gen gezichte, maar de vogels bleven wal een tiedje van de karsen of en doar ging het umme.De leste wekken zeej’ in en um Battem wier onmeunig völle skiws. Noh ja skiws, doar bint er wat biej, die bint zo mooi, die schrikt neet of, maar bint kennelijk um te stealen. Beste mensen det is neet de bedoeling. Ankommenden Hemelvaart is ter ne groten fietstocht in en um Battem. Det is al veur de elfde keer en de organisatie hef veur disse tocht het toepasselijke motto, ‘Doot is gek’. De fietstocht breg oe langs heel völle mooie en lillijke skiws. Ôônderweg is ter ook nog van alles te doon en te zeen en det wil gen mense missen. Mocht ie neet met fietsen zet dan in ieder geval een skiw an de weg, dent zo lillijk is det de lèu der van of blieft. Ie kunt er ook nog een barbequiepakket met winnen. Mocht oen skiw der noa de fietstocht nog stoan, dan kun ie den mooi in de boom hangen, zodat de veugeltjes oe neet alle karsen op et. Opa höng der vaake ok nog ne belle bie in en iedere keer at e dan noar buuten kwam um de sik te verzetten, trok hij an de belle en zag e de gevederde vriendjes in grote koppels de boom uut vleegen. Mocht ie gen zin hebben um te fietsen of skiws te bekieken in ieder geval vuur iedereene, ne prettigen Hemelvaart.