Bathmensekrant.nl is een uitgave van Artzet Media en heeft als doelstelling het dagelijks nieuws uit het verspreidingsgebied van de Bathmense Krant te brengen in de vorm van een online krant.

Hosanna

Moo hef de eier gekokt in het broen van de buisman en het greun van de edgar. Het zit er wier op. De eiernetjes met onderin ne dikken sinaasappel, een paar hardgekokte eier en bovenin eene van zuukelaa, bint noar binnen gewarkt.In grote antallen kwammen de kinder noar de Poasweide um met mekaa eier te kuulen en de oolders kekken vermakelijk touw. Ok de haantjes met de buxustakjes bint van het stökske en opgegeaten. Onzen leeven Heer is met Hosanna binnen gehaald op nen ezel. Olde gebruuken, hoolt ze in eere. .Allemoale met de snuffert kieken op zo’n beeldscherm, is ok niet alles. Loat wie het tenminste niet hoppen. Met mekaa op noar de Poasen. Van de wekke kon ie ze zeen euizen in hagel- en schneebujjen. Zie stoat er weer, de poasvuren in Loo en Dortherhook, mar ook in de veerdere umgeving. Op Goeie Vriedag en Zwatten Zoaterdag wordt er de laatste hand an gelegd. Goeie Vriedag, hoe zo goed? Judas hef ziene zilverlingen in ontvangst genomen, Petrus hef de haane loaten kreien en oonzen leeven Heer is hen egoane. Op Poaszundag zult ze branden. De wereld zal verlicht worden met het veurjoar en de opstanding. Doar is weer hoppe. Eensgezind stoat de mensen te kieken in den kolkenden veurglood. Een ieder met ziene gedachten. Netuurlijk goa we met ne boek vol eier noar de boake um te genieten van die likkende vlammenzee, diet zien weg zoch noar den hemel of het zwarte gat. Doar klinkt muziek bie de boakes. In Jeruzalem is de wieze in eene wekke veranderd, van Hosanna, noar kruisigt Hem. Pilatus wast de hande in onschuld en Barrabas is de held van het volk. Het oole gebruuk krig de schuld van de fijnstof. Wie moet allemoale terugge. Het vleegverkeer wordt als maar meer. Woer het hen geet, de tied zal het leren, maar vuureerst, allemoale een vrolijk Poasfeest.