In Loarne weet ze det al

Argens in de binnenlanden tussen Lochem, Reurle en Vorden, doar zit ze. Van vrogger uut ne geheimen zender, maar tegenwoordig ne professionelen radiozender met vuur iedereene völle mooie muziek. Radio Achterhoek fm. Toen ik der veurige wekke ne keer hen reed, vreug ik mien of, woar begint den Achterhook.Eigenlijk is det al, zo gauw as ie de Schipbekke oaver bint. Het maakt ook niks uut, feit is, det het ne zender is met völle mooie muziek. Toevallig kwam ik met die jongens in kontakt en sinds een klein joar lees ik doar iedere zundagmorgen um kwart oaver tiene mien verhaal veur an de luisteraars in Salland, Twente en den Achterhook. Zonder anderen te kort te doon zôl ik zeggen, luustert is op de donderdagoavond noar den Lustigen Heinrich, met zien prachtige bloasmuziek of op zundagmorgen noar, op de koffie bie Dick. Ie kunt er hen bellen veur een verzoekplaatje. Het blif mooi as ie mensen verrast met een plaatje bie een verjeursdag of jubileum. Veurige wekke was e wie doar in de studio veur de duuzendste uutzending van, op de koffie. Het worden der Achterhooks gezellig met het oaverbekende Brook Duo. De mensen genoten van de streektaalmuziek van disse twee kanjers uut het Twentse Markelo. Begin december nemt de Badmutse ofscheid, maar de Weuste geet vedan met zien nieje partner Bokie. Hool ie van Oostenriekse deuntjes, oavergötten met een sausje dialect. Bie de Haverkamp presenteert ze in december hun niejste CD. Zorgt dat ie der bie bint, want het is doar altied weer, ons kent ons, in de taal woarin wie ons zo geerne loat heuren. Achterhoek fm is de heele wekke deur te beluusteren via FM 104,9, 106,7 en 107,9, maar det weet ze in Loarne al.