Bathmensekrant.nl is een uitgave van Artzet Media en heeft als doelstelling het dagelijks nieuws uit het verspreidingsgebied van de Bathmense Krant te brengen in de vorm van een online krant.

Wat is ter toch gebuurd?

Doar waren twei bèume in Battum, met een verhaal. ‘N èèrsten, den ôôlden Lindebôôm van Leny en den anderen, woet det magere keerltje boaven in zat. Gelukkig, biej het rond goan deur Battum zag ik ik ’n eersten nog stoan. Mà vieftig meter veerderop scheet oe de troanen in de oogen, àj zeet dat den magischen grooten kastanje der neet meer steet.De eerste alarmerende berichten kwammen zoaterdag à deur. Vanalles schöt er deur oen hen, de commentaren waren neet van de lôch. Zie sprökken van groote schande tut, völle heisa um ne bôôm. Ie wilt er geerne wat van zeggen, maar het juuste weet ie der niet van. Wat het ook is, hoe het ook is egoane, de Belcampokastanje is niet meer. Ieder joar liep ik met mien kleinkinder der onder deur en weeze ze op det schriele männeke, doar hooge tussen die groote kastanjeblaaden. Had det noe niet wat anders ekönt. At de juuste weagen bewandelt bint, had det toch ook wel an de Battummers verteld meugen worden. Was de boom zo ziek, det e weg môs, had het ons verteld dan waren wie met ne hoop dorpsgenoten niet zo onmeunig geschrokken. Het kan toch niet zo waezen det e zonder vergunning is neer gehaald. Wie zult het juuste verhaal nog wel onder oogen kriegen. Wat gebeurt er met het magere männeke? Hij krig toch zeker wal een niej pleatske in één van de oavergebleven monumentale beume in de kern van ons Battum. Wie loat ons verrassen met doarbie ne waarschouwende vinger noar al die snelle hoolthakkers. Wèèst zuunig op alles wat er an mooie beume stoat, één keer weg ehakt, moet ie der weer honderd joaren op wachten veur det er weer zun ne boom steet. Jammer, loat wie hoppen det er een goede verkloaring kump, woerumme of den kastanje mos wieken, of hebbe wie met zien allen zitten sloapen?