Bathmensekrant.nl is een uitgave van Artzet Media en heeft als doelstelling het dagelijks nieuws uit het verspreidingsgebied van de Bathmense Krant te brengen in de vorm van een online krant.

Keunedarp-Pompersgat: 1-2

De echte Battemse supporters waren noar Keunedarp egoane. Het mos gebuuren. Sommigen iets te laate, maar met de brilstand nog op het scorebord, zeet de wedstried verlopen op de verkeerde kante van het veeld. Maar dan, an het einde van de eerste helfte, kump ter ne golf van Pompersgatse aanvallen op het Keunedarper doel.Wat de Keunedarpers neet deuden, lukt de Pompersgatse elf wal. De Hoolter verdediging löt geater vallen en doar worden gebruuk van gemaakt. Ofstraffen die handel, met twei fluwelen Battemse doelpunten zeukt de grote rivalen de kleedkamers op. Het trouwe kiekersvolk kan zich een betje opwarmen in de kantine. De Hoolter kenners hebt hun oordeel al kloar, de Battummers stoat er terecht glunderend bie. In de tweede helfte probeert Keunedarp nog wel wat druk te zetten, maar doar dut ABS neet an met. Ech mooi voetbal is het neet. Het geet hard teegen hard, maar gelukkig blieft zwoare blessures uut. Keunedarp dringt an, maar den ansluuttreffer kump ter vuuralsnog nog neet. In het leste kwarteer mot ABS in de verdediging, ma wat Hoolten ôk dut, de Battumse verdediging vecht met man en mach um de punten met te nemmen noar Pompersgat. Det verdedigen geet ten koste van ne oavertreding binnen de zestiene. Pengel, doar is gen hoolden an (1-2). De Keunedarpers blieft andringen maar keer op keer is de Pompersgatse keeper de baas in het doelgebied. Hij wördt de beste man van het veeld en zörgt er vuur det de punten met goat noar Battem. ABS dut wier met um de titel, want ôk koploper Markel kan maar eene punte metnemmen uut Enter. Noa ofloop geet het in polonaise noar de kantine. Sommige Hoolter vindt det een geliekspel wal verdeend was, maar doar denkt de Battummers heel anders oaver. Met ne glimlach van oor tut oor nemt ze de belangrieke puntjes met noar Battum.