Plan De Brink
Klik hier om de 3D animatie te bekijken

Merakels gezellig

Het hooft allemoale neet zo grootschalig te weazen. Twei kleine podiums bie Kultuurhuus Broakhekke, een springkussen met een paar ettentjes, redelijk mooi weer en jong en oold hef een prettige Hemelvaart. Doarbie was ter, net as andere joaren, ne fietstoch uut e zet, dent er moch weazen.Det kan ook neet anders, want de umgeeving van Battum en umstreken neudigt uut um te fietsen. Het was dit joar ook weer een groot succes. Groote koppels fietsers trokken deur het veurjoarslandschap van het Battumse boerenland. Uuteindelijk tweiduuzend deelnemers en doar zult de organisatoren iets op mötten vinden. Zo of en touw was het een betje file rieden. Veur de rest, groote klasse en noa ofloop genieten op het plein bie het Kultuurhuus. Gezellig vol, völle zitplaatsen en hangtoafels um het leste niejs uut te wisselen. Wie konnen allemoale zeen hoe of de nieuwbouw teegenover Broakhekke is e geworden. Het is in iedere geval neet lilleker en as ie van old hoolt kiek ie gewoon in de richting van Jootje van de Bakker. De mensen konden volop genieten van een hapje en een drankje en al die optredens. De Bekkezangers wordt als maar better en de vuursprekker deed het opvallend good. Maar het mooiste is toch de gezelligheid en het, ons kent ons geveul. Niks gen groote festivals met onmeunig völle lawaai. Lekker met femilie, kammereuie of bekenden eaven bie proaten en genieten van alles wat er op det pleintje gebeurt en dan met ne buul patat op huus an. Gelukkig det Pinkstern en Poasen niet op eenen dag valt. Pinkstern hebt wie nog te good. Geniet er van, want de mooie veurjoarstied lig zo weer achter ons. Zo en noe eaven noar buuten, de loch opsnoeven van het vars gemeeide grös. Allemoale alvaste, mooie Pinksterdagen.