Bathmensekrant.nl is een uitgave van Artzet Media en heeft als doelstelling het dagelijks nieuws uit het verspreidingsgebied van de Bathmense Krant te brengen in de vorm van een online krant.

Moodertje leef

De mooderdagblomen bint gekocht. Honderdtachtig begonias stoat er in de tuin te pronken. In het darp zag ie vaders sjouwen met grote bossen blomen. Zie bint mooder neet vergetten. Mooderdag, de kinder komt. De worskes ligt te pruttelen in de panne en de whiskey steet kloar um te worden genuttigd. Vaa kik ter noa en weet det er wier etten en drinken genog is. Straks bint ze der allemoal.Mooder löp zich het gat uut de noad um alles maar piekfijn vuur mekaar te kriegen. En vaa, hij zal nog ne wekke of wat gedeuld mötten hebben. Familiedagen, altied mooi um noar uut te kieken. Ja met mooderdag is het makkelijk, ie weet wat ie geven kunt, ne bos bloomen en het is vuur mekaar. Bie vader lig det ingewikkelder. Ne grote rollade mag neet meer, slech vuur het milieu. Roken is slech vuur de gezondheid en drank, doar valt e van in sloap. Gelukkig, wie kunt er nog eaven over noa denken, maar de gedachte an ne kilo kunstvleis kump of en touw biej oe op. Alles veur het milieu en ne schone wereld. In Duutsland stokt ze nog op broenkoll’n. Geef mie maar Amsterdam. Alhoewel, ie moet mar ofwachten hoe of het allemoale uutpakt. Het belangriekste is, det ie neet te veer vuur de troepen uutloopt, want dan zet ie oe zelf buutenspel. Mooderdag lig achter oons en ie kunt er noe al van genieten as al die vaders, in plaats van an ne lekkere rollade of een worske, in één keer an het kunstvleis moet. Doar is nog nen uutweg. Deodorant is ok nog een favoriet kedoo vuur de keerls, mar of det noe good is vuur het milieu? Moeilijk àmoa, ne trad trugge en wier an de greune zeepe. Mooderdag was zo gek nog neet, de worsjes en de whiskey smaakten merakels.