Bathmensekrant.nl is een uitgave van Artzet Media en heeft als doelstelling het dagelijks nieuws uit het verspreidingsgebied van de Bathmense Krant te brengen in de vorm van een online krant.

Ne nieje tasse

Zoaterdagmänn’n, de kràànte he`k net uut. De vrouwe trekt de schoone an. Wat zôl der stoan te gebuuren? Maak ie miej nog soep? Ik wil eaven noar de kapper en dan goa ’k meteen oaver de kunstmarkt. Ja, zoaterdags bin ik de kok. Noe moet ie oe doar niet te völle bie veurstellen. Meestal is het een betje soep, ie weet wa, balletjes dreijen, een betje smallook uut de tuin, vermicellie der bie, eaven preuven en kloar is kees.Het hoofdgerecht is nog simpelder, gebakken eerpeltjes, een spekhärske, eaven lekker metbakken, alles duur mekaa, met de leste sloabeuntjes en wie kunt er weer tegen. De moaltied is al hoog en breed kloar as moeders met eur nieje kapsel weer op de kökken steet. Het was ter onmeunig drok. Van alle volk leup ter, van kunstleefhebbers tut kunstenmakers, maar ook gewoon de niejsgierige leu, diet zich nog ne nieje schilderieje, een sierroad of een stukske keremiek wollen kopen. Nee, ech gezellig en wat hebt ze geluk gehad met het weer. Ik begrep al rap, dat ik wat had emist, maar det geschoefel langs al die kreuime met kunst en snuisteriejen, het duurt mie vaake te lange. Det is het verschil tussen leefhebbers en barbaren. Oaver ne wekke of wat bin ik an de buurte, de joarlijkse rommelmarkt, met de veiling. Ja de één heult van de dochter en de ander van de mooder. Zie raken der niet oaver uutverteld. Uuteindelijk vreug ik uut goed fatsoen of ze nog wat ekocht had. Eaven was het stille en toen klunk het, ne nieje tasse. De olde tasse was kepot en dissen vund ik mooi. Ne nieje tasse op de kunstmarkt. Wat een wiesheid en det is noe de kunst, het nuttige met het angename te verenigen. Oaver ne wekke of wat kom ik vaste wal weer bie huus met één of ander kunststuk van ne bienoa vergetten Battemsen schilder, Zo holde wie onze tassen- en kunstcollectie op peil.