Bathmensekrant.nl is een uitgave van Artzet Media en heeft als doelstelling het dagelijks nieuws uit het verspreidingsgebied van de Bathmense Krant te brengen in de vorm van een online krant.

Snelle Henkie

De ronde van Fràànkriek is veurbie. Völle vrouwen zölt blie weazen. De keerls kunt weer kieken noar één tegen honderd. De grötste hette heiw we gehad, völle mensen zölt blie weazen. De vakanties bint gelukkig nog neet veurbie. Inmiddels is half Battum weg getrökken noar nog warmere oorden en de andere helfte kan genieten van een drankje op de Brink. De buutengebieden ligt er gereusterd bie. De boeren wilt de reagen wal uut de lôch kieken. Joa, doar is een betje water gekommen, maar het is ne dröppel op ne gleuiende plaate. Augustus is in het land en dus ook de Lettelse karmse. Een mooi begin um al vaste in het ritme te kommen van de Loarnse en de Battumse karmse. Nieuwe sporthelden bint op gestoane. Hockeysters en waterpolosters, maar de grote helden bint toch wel Tom Dumoulin en Steven Kruiswijk. Twee Nederlanders bie de eerste vieve in de Ronde van Frankriek. Veur het eerst in meer dan vieventwintig joar weer een podiumplaatse in Parijs. Maar ook in Battum heiw we een nieje fietsheld, Snelle Henkie. Officieel is nog niet helemoale, maar gedurende de ofgeloopen drei weake reed hij konstant in het gel in de Battemse tourpoul. Mocht het anders weazen dan kump ter vanzelf ne korrektie. Hij kan röstig met vakantie goan net zo as de Battemse krante. Hij hooft gen criteriums te rieden. Allemoale eaven onderduuken in het water van de Middelandse zee of gewoon in in ons eigen zwembad in Loo. Genieten van hoppelijk nog ne langen zommer, met zo of en touw een bujke reagen. Iedereene tevreaden, iedereene ne fijne vakantie, iedereene good in huus kommen en dan gewoon vedan met het dagelijkse leaven. Koning voetbal, Go Ahead, of toch maar weer ABS, de Witkampers of Lettele.