Bathmensekrant.nl is een uitgave van Artzet Media en heeft als doelstelling het dagelijks nieuws uit het verspreidingsgebied van de Bathmense Krant te brengen in de vorm van een online krant.

Vakantie

De vakantietied is begunnen. Wiej hebt het er al opzitten. Toch altied lekker um der eaven tussenuut te weazen. Ie duukt onder in een roes. Ie komt er achter det er al een hoop leeftiedsgenoten alleene moet reizen. Iedereene hef zo zien verhaal.

Eene mevrouw wol zo geerne nog is weer noar de Provence, umdet ze der joaren lang was ewes met eur man. Zie vund het maar moeilijk alleene. Wie gungen, umdet de natuur doar zo mooi zol weazen. Veur anderen was het pauzenpaleis in Avignon, een heugtepunt. Hoe het ok zij, de dagen vleuigen veurbie. Een gemelleerd gezelschap trok rond, langs witte peerde, zwarte stieren en rose flamingo’s. Onderweg nog eaven langs Parijs en de Pont du Gard. Olde steden as Arles, Nimes en Avignon, maar veural de indrukwekkende Mont Ventoux wörden an edoane. Wie begriept noe nog better hoe zwoar of de wielrenners het hebt at ze op den barg, de bos uutkomt en hoe veer het dan nog is noar den top. Hatstekke mooi allemoal, maar de deursnee woningen zeet er toch mar old en verkrot uut. Doar zôllen onze timmerleu en schilders hande vol wark hebben. Nee, dan zut Deaventer der toch wal iets better uut. Met schoone toiletten nemt ze het ook neet zo nauw. Het geet er allemoale met de Franse slag. Een paar wekke is mooi, maar geeft mie maar ons eigen landje. Wie kankert wal, van dit is niet goed en doar klopt niks van, maar as ie nog gen duuzend kilometer veerder kiekt, heb ie gauw in de gaten, hoe goed of wie het allemoale hebt. Het is mooi um eaven weg te weer, maar nog meuier um weer thuus te kommen. Vuur allemoale diet nog goat, fijne vakantie en komt gezond trugge in ons mooie landje.