Bathmensekrant.nl is een uitgave van Artzet Media en heeft als doelstelling het dagelijks nieuws uit het verspreidingsgebied van de Bathmense Krant te brengen in de vorm van een online krant.

Verget de veugeltjes neet

Eindelijk is het zo veer. De bloomen stoat hooge vuur de roeten. Het vrus ter lekker op lös. Minder fijn vuur het ongedierte, minder fijn vuur de veugeltjes. Het is machtig mooi winterweer. Het neudigt uut um nen eine te goan wandelen. Alhoewel, as ie noar buuten kiekt, is ter ook genog te zeen. De veugeltjes vleegt of en an um zich te good te doon an zunnebloompitten.Het valt op dat er gen merels bie bint. Hoofdzakelijk de mezen komt an de roete. Ja, an de roete, want de kinder hebt mien een plestieken voederhuuske gegeven. Ie plakt het an de roete en de veugeltjes vleegt bienoa bie oe de kamer in. Van de wekke komt er nog wat vetbollen bie en gegarandeerd, dan komt ook de specht en de eekhoorn weer op visite. Juust noe de vorst in de grond zit kunt onze gevleugelde vriendjes völle minder voer vinden. Een betje hulpe is welkom. Vuural as ter de kommende dagen ook nog eens schnee bie kump. Ie stoat er van versteld wat er allemoale an het veinster kump tikken. Sommige soorten blieft wat meer op ofstand. In één keer zit er eene tussen, die niet alle dagen ziet, de gekraagde roodstaart. Schnee, astebleef neet te völle, want dan lig heel Nederland drek plat en doarbie, de leefhebbers zit toch allemoal al in de Alpenlanden. Gewoon een betje vreezend weer vedan, zodat de jeugd de weg kan vinden noar de iesbaane. Lekker een baantje trekken en genieten van de winter. Hool ie neet van schaatsen, ook een een glaasje glühwein met amaretto of gewoon ne komme zuukelaa geet er altied wal in. Winter, al is het maar eaven, geniet er van. Noa al det grieze weer van de leste moand bint wie der hard an touw en bie alles wat ie doot, verget de veugeltjes neet.