Bathmensekrant.nl is een uitgave van Artzet Media en heeft als doelstelling het dagelijks nieuws uit het verspreidingsgebied van de Bathmense Krant te brengen in de vorm van een online krant.

Verstilde gedachten

Dreumerig kiek ie noar buuten. Zôl dit dan noe het ofscheid weazen van den onvergettelijken zommer. Het is windstille. De blaa, zo of en toe dwarrelt er eene noar beneden. Het leefste blieft ze nog eaven. Doar geet er wier eene, Wim Kok. Ne man diet tut de verbeelding sprök.De tied van het joar. Niks heult de tied tegen. Het is een kommen en goan. Niej leaven, geniet er van. Zô bin ie jonk en dan veur altied opa en opoe. De dag van vandaage, geniet er van. Morgen kan alles anders weazen en de harfs in alle hevigheid touwsloan. Rèagen, wind en kale bèume. Wiej zit er op te wachten. Arwtensoep, moos en hutspot, zie meugt er miej veur wakker maken. Ie zeet er noar uut. Volgende wekke, de boeldag in Battum, dan köw we onze vuurroad kunst en kits wier anvullen. Um tien uur stroomt het volk met honderden teglieke noar binnen en vief minuten later komt de eersten al weer noar buuten met det biezundere teuifeltje of ne deuze met karsballen. De tied vlug harder as de bladen. Het liekt hoaste of het alle wekke boeldag is. Doar valt wier een blaadje. Een roodborstje zit er verwonderd noar te kieken. Het is als of het zeggen wil, kom is uut den stool en kiekt is um oen hen hoe mooi of alles is. Het hef geliek, de schoone an en eaven ne frissen neuze halen. De harfskleuren wordt met de dag mooier. Genieten van de röste. Wat nen armood, den brand bie de Pöste. Alles vôt, det peerd zal oe maar sloan. Tien minuten later genieten van ne komme koffie. In de roeten zeej’ de trein in alle stilte op Deaventer an goan. Het enigste teken det de tied neet stille steet.