Bathmensekrant.nl is een uitgave van Artzet Media en heeft als doelstelling het dagelijks nieuws uit het verspreidingsgebied van de Bathmense Krant te brengen in de vorm van een online krant.

Völle geluk in ’t Niejjoar

De leste klanken van de midwinterhoorn starft weg oaver de Menop en de Oerbosdiek, één van de meuiste plekjes van ons Battum. Dezelfde klanken diet op Karsoavond oaver de Hoolterbarg klunken um de jongens te herdenken diet hun leaven lieten veur de vriejheid, woet wie noe al weer bienoa 74 joaren van geniet. Dan op noar de worstepannekooke, of een femilietraditie, diet völle mensen ongetwiefeld hebt. Met de Karsdagen met familie en neuisten genieten van de karsmoaltied.Zes januari, drei koningen, de eerste wekke van 2019 is al weer veurbie. Völle schnee in Oostenriek, maar hier nog altied gries en miezerig. Bie een glühwijntje nog eaven noa genieten van al die feest, et en Karsdagen. Ie kiekt er op trugge, niks winter, zacht weer. De leste Brocante an de Diepenmarsweg. Gelukkig een schaatsbaane op de Brink, gelukkig de Battemse Kwis. Oaveral in het darp femilies Flodder, oma’s met ne dikke sigaare in de mond en opa’s diet ze in een wagentje hebt zitten. Wie geet er strieken met de eeuwige roem. Volgende wekke weet wie meer. Noa de Karsdagen op weg noar Oldejoarsoamd. Ieder op ziene maniere. Proberen um de narigheid achter te loaten en de mooie herinneringen met te nemmen. Niejjoarsdag, hoorn op de nekke, um samen met de buren, mekaa het beste toe te wensen. Jong en old, met mekaa genieten van oliebollen kniepertjes en grote salades. Natuurlijk wordt er oaveral eentje of meer edrunken op het gloodniejje joar. De leste knallen van 2018 heur ie her en der, veer in de umgeeving. Toch weer dooden, gelukkig niet hier, maar toch. Ieder slachtoffer is ter eene te völle. Wie kuiert met zien driejen op huus an, de hoorns op de nekke. Drei Koningen, de hoorns kunt weer een joar de kaste in. Morgen geet de Karsboom de deure uut. Met weemoed kiek ie trugge op die altied gezellige decembermoand. Vedan, de grote boze wereld wacht. Doot allemoal heinig an en veur iedereene, völle geluk in ’t Niejjoar.