Bathmensekrant.nl is een uitgave van Artzet Media en heeft als doelstelling het dagelijks nieuws uit het verspreidingsgebied van de Bathmense Krant te brengen in de vorm van een online krant.

Völle geluk in Niejjoar

Loat det vuurop stoan, met doarneuist, allemoale gezond blieven. Het is nen achtbaane woar wie ieder joar in trechte komt. Ie kiekt er teegenan, Karsdagen en Old en Niej. In ne flits is het Karsoavond, vakantietied, eaven de zorgen an de kante. Eaven tied veur andere dinge as de narigheid op het wark en het verdreet van alledag. De bosschoppen wordt e haalt, de krisus is veurbie zegt ze. Het is te hoppen dat iedereene det markt, vuur zo veer as wie las hebt e had van krisus. Bie de winkels hingen ze der met de beene uut. Karrevrachten vol bosschoppen worden der met e slept noar huus hen. Zelf bint wie traditiegetrouw de Karsdaagen begunnen bie de keerskesherdenking op de Hoolterbarg. Eaven stille stoa bie de jonge jongens diet het leaven hebt e loaten bie de bevrijding van Oost Nederland. Dan op noar de warme kachel en de pannekooke met wors. Vrede op aarde, het lik zo gewoon, maar pas op! De karsdaagen vleuigen veurbie en Battum maken zich op veur de joarwisseling. Op Oldejoarsdag heurden ie her en der op het platteland de enorme klappen van de carbidbussen. Op Oldejoarsoavond veur de eerste keer in Battum een gezamenlijk vuurwerk. Het was een schot in de rooze en het zal vaste wal een vervolg kriegen. Um 12.00 ’s nachts kwam veur iedereene het definitieve ofscheid van tweeduuzendzeuventiene. Op de eerste januari vleegt de goede wensen, tussen de oliebollen en de nodige alcoholica duur, oaver de toafel. Ie komt ’s oavonds laate tut ruste in de stool en de andere dag geet het leaven van alledag onverbiddelijk weer vedan. Zo geet het joar noa joar. Wie stapt allemoale stapt weer in de dagelijkse sleur van het leaven. Völle geluk in Niejjoar en blieft gezond.