Plan De Brink
Klik hier om de 3D animatie te bekijken

Wie hebt weer winter

Vanmonn’n werd ik wakker. Ik verheugden mie al een betje op een wit loagje schnee. Jammer, ik zag de witte wereld alleene mar op de televizie. Lange files. Oaveral waren ze bèèzig um de weagen schoon te kriegen, alleene bie ons was ter niks anders te bewonderen as nattigheid. Wat mot het toch worden as e wie is echt winter kriegt, zeg mar, drei weaken, alle daagen schnee en vreezend weer. Dan is Holland pas ech in las.De leste echte winter die wie beleaft hebt is volgens mie in 1979 ewest. Ik bin bange det ik een betje een selectief geheugen hebbe. In ieder geval was Battum bedekt met een loage schnee en het vreur nog det het kraak’n. Het was gen weer um de vrouwe noar buuten te sturen, dus ging ik zelf maar op pad. Veurzichtig krabbeln ik noar buuten um de raampjes van de auto schôône te maken. Det lukk’n van gen kante. Eindelijk had ik de veurroete een betje iesvrie en doar tukkern ik hen. Leavensgeveuirlijk. Net op tied was ik op de juuste plaatse um de jonge dame of te halen. Zô had ik die morgen in één keer dree dames en twee dokters in huus. Één dame in het kroambedde, eene diet zich drek al leut heuren vanuut de kinderkamer en de kroamhulp. Al eerder op de morgen was dokter Itjeshorst onverwachts e komm’n, umdet Westra deur de schnee noar Okkenbrook was e ploetert, veur ne bevalling. Een uurtje later waar’n ze met hun beiden de gezonde negenponder an het bewonderen. Ja, det was nog is een winter, die oe veur altied zölt blieven herinneren.

Het zwarte schoap.