Bathmensekrant.nl is een uitgave van Artzet Media en heeft als doelstelling het dagelijks nieuws uit het verspreidingsgebied van de Bathmense Krant te brengen in de vorm van een online krant.

Wit zwart, respekt, zwart wit

Altied as ie deur het darp hen gingen, altied was hij al doar. Iedereene kennen hem en zeker as ie bie ABS regelmoatig kwammen buurten. Ook de jongeren uut de plaatsen in de umtrek kwamen hem in de joaren zestig en zeuventig al tegen bie Boode, woar hij keurig de biertjes rond brach, zodat ie wat meer mood kreegen bie het vrouwvolk.

Wie vreugen hem altied of ABS had e wunnen, veural, en det wisten wie, at ze hadden verleuirne. Het was de gezonde rivaliteit tussen de wit zwarten en de clubs uut de buurte. As bestuurslid bie zien ABS was e neet weg te denken. Meerdere keren kwamen wie mekaar tegen in de bestuurskamer. Hij kon prachtig vertellen oaver ziene beleavenissen as voetballer en later as scheidsrechter. As e éénmoal op den proatstool zat, heul hij neet meer op. Een echte bestuurder, gen metlooper en doar deur heb ie niet alleene vrienden. Een man met een groot hart vuur zien ABS. Een kwart eeuw later, hij was nog altied penningmeester, dragen hij ziene portefeuille oaver an de volgende generatie. Ook toen hebbe wie, as senioren, de geschiedenis nog eens weer deur genommen. Det lös laoten vund hij neet makkelijk, maar gelukkig kon hij nog völle blieven doon. Hij bleef een boegbeeld veur zien kluppie. Het dut zeer, as ie zeet det de tied vat krig op zunne energieke persoonlijkheid. Ie kriegt het berich  det e neet meer onder ons is. Het is niet zo det wie mekaar zo heel goed kenden, toch schrik ie as ie heurt det e uut de tied is. Wie zult hem nooit meer deur het darp zeen goan op zien ABS-fietse. Henk Baars, wit zwart, zwart wit en deepe respekt.