Bathmensekrant.nl is een uitgave van Artzet Media en heeft als doelstelling het dagelijks nieuws uit het verspreidingsgebied van de Bathmense Krant te brengen in de vorm van een online krant.

Zeg Roodkapje

Het liekt wal of wie in een sprookje leeft. Is de harfs noe begunnen of is het nog altied zommer en hebt wie de harfs over.esloane. Sunterkloas is in het land en det is toch een teken det het winter is. Het moet wal zo weazen want onzen beuken is kaal. Het liekt er trouwens op det de Pieten een slecht zommer hebt gehad door in Spanje, zie bint er neet broener vedan gekommen.Noh ja, het maakt de kleintjes niks uut, at er maar kedootjes in de schoen zit. De veurroad heui is al drastisch angetast, maar ja, eigen schuld, moet ie maar niet iedere keer zeggen, dat det peerd meer verdeend as een fuske heui. Tussen de karsverlichting en Sunterkloas duur, zeej’ hier en doar ôk al een verdwaalde Prins Carnaval. In Deaventer hebt ze veur de zovölste keer een Prins Hanze. Zelfs in Diekerhook hebt ze, noa joaren, weer een prins van eigen bodem, Prins Hens van Kalverderk, de frontman van de Reeperbaner. Ie raakt er met in de warre. Det kan ook niet anders at roodkapje oe de tande löt zeen en Jopie, as ne gemotoriseerden kebouter, oaver het toneel hen schöt. Wie hebt kunnen genieten van al die verkleedpertiën. Wel zôl ik Roodkapje an willen roaden, warme wollen kousen an te doon, noet de winter veur de deure steet. Trouwens, ie weet nooit met die jagers, at ze in één keer met zo’n been an het kieken komt. Zie scheet mangs maar zo raak. Ja, de winter kump ter an. Ofgeloopen wekke zag ie mistflarden boaven de bevreuren Battemse veelden en de kommende dagen kump doar, as het een betje met zit, nog de eerste schnee bie. Dan moet den tuinkabouter nog an het schnee schoeven at Roodkapje noar het bos wil.