Plan De Brink
Klik hier om de 3D animatie te bekijken

Zunnebloomen

Zie vleegt um het huus hen. Ie moet wal ogen veur en achter hebben. In één keer zeet ie ze neet meer. Zie bint weggedökken achter de zunnebloomen. Die stoat bie ons al twei meter hooge. Det kump umdet ze in de bloomenbak terechte bint gekommen. Ofgeloopen winter hebt wie de veugeltjes bie gevoerd met zunnebloompitten. Zo te marken hebt ze die neet allemoale opgegetten en zo hier en doar zeet ie noe de resultaten van eur rommelige wark.Het is eigelijk wal een grappig gezichte, zunnebloomen diet hooge opkomt uut de bak met begonias der onder. Het lik net een ech, mooi natuurlijk monument. Woer bint de wichter noe? “Opa ie moet direkt kommen. ”Ie schrikt en vroagt oe of wat er an de hand is. Vuur mie stoat veer kinderoogen diet mien vroagend ankiekt. “Opa wat is det?” In een oogopslag bekiek ik het: een uutgedreugd skelet van een veugeltje. “Opa doar ligt er nog völle meer, kom is gauw.” Met een strak gezichte kiek ik onder in de bloomenbak en ik beseffe wat vun drama of zich doar veurig zommer hef ofgespöld. Een stuk of wat uutgedreugde restanten van veugeltjes ligt stille bie mekaa. Um het drama niet groter te maken geef ik ze het veugelskeletje met noar huus. Hebt ze noa de vakantie iets um an de jufvrouw te loaten zeen. Het vuurval is rap vergetten, wie hebt de beide zunnebleumpkes inmiddels ofgeleverd bie de olders. Det is het mooie van grotoolders weazen. Noa alle drokte is het weer röstig en het valt mien noe pas op det de drei zunneblomen, vlak veur de roeten, met de zunne met dreijt. De natuur zit zo machtig in mekaa. Ie moet het alleene willen zeen. Met eerbied kiek ik noar het mooie monument van begonias en zunnebloomen, vuur die veugeltjes, diet zo naar an hun einde bint gekommen.