De Verkiezingen bint ewes. Der is in Dèimter neet zo völle veranderd. De man met onmeunig völle vuurkeurstemmen nemt gelukkig zien zetel in. Hij stun op de negende plaatse, maar van Lijst Loo was hij wis en waarachtig de liesttrekker ewes. Doarumme alleen al heurt hij in de Road. Een paar vertrouwde gezichten goat wie missen, allemoale bedankt, het geet oe goed. Wie hebt er vertrouwen in, det de opvolgers deurgoat met een nuchtere kiek op de stad en de umliggende dorpen en good met blieft doon an de politiek. Deaventer, van oolds her een rood bolwerk, is deur alle herindelingen völle kluuriger geworden. Lees verder →

Heel geheimzinnig. Wie was disse Godin? De geleerden bint het er niet oaver eens. Wie hoolt het er op det het een Saksische Godin was van de lente en de vruchtbaarheid. De Saksen, ooit hier noar Salland gekomen, heulden van het stokken van grote vuren, um de winter te verjagen en de lente op te halen. Het verbranden van bossen en holt maakten de grond vruchtbaar. Lees verder →

Nee, gen beume disse keer, gewoon boeken. Van de wekke zat ik te kieken noar beelden van het grote boekenbal in Amsterdam. Van allerlei schrieversvolk kwam der oaver den rooien loper um met mekaa een gezellig feesje te bouwen. Det moet wie in Battum ok ne keer doen, moet ze gedacht hebben. Ja, det wis ie misschien nog niet, maar wie hebt in Battum ook geweldige schrievers. Doar zit er zelfs meerderen in Loo Battum en loat noe juust, dreie doarvan, op 17 meert beginnen met ne echte bookenpresentatie. Lees verder →

Nog neet zo lange geleden was ter op de Battemse karmse nog ne echte schoapenmark. Jammer genog, deur regeltjes van disse nieje tied, is det niet meer. Gelukkig zeej’ in de buutengebieden nog wal is ne heele kudde lopen. Een mooi gezichte, die wollen bolletjes op die kaale weidens. Met de keulte van de ofgeloopen wekke zult ze noe wa binnen weazen.

Lees verder →

De vergadering is ewes. De gemeente hef zien excuus angeboden. Doar zat nog gen rot holt an de boom, mar is volgens de experts terecht gerooid. Den boom was doodziek, maar hef wel de storm oaverlèèfd, terwiel det zo völle andere beume het leudje hebt eleg. De gemeente zal nog uutleg geven in de Battumse krante. Juust det mot ze doon, het Battums gemeentelijk niejs in de Battumse krante en niet in de Steden Driehoek, dent in Battum as één van de eersten bie het old pepier lig. De gemeente moet der oog veur hebben, det ook het niejs in de kleine kernen duudelijk veur het voetlech wordt ebrach.

Den boom, was ter noe drek direct gevoar det e umme zol vallen? Nee heur, as die oolderdomskwoale der was, hadden ze ‘m toch ook wal alle joaren eaven kunnen controleren, net as det euldere leu ne griepspuite kunt halen. Nee heur, het advies was ter, dus, de biele der in, wie hebt wal wat anders te doon, as ons druk maken oaver nen olden boom in Battum. Want zo is het, as dissen boom, met of zonder Belcampo op de Brink in Deaventer had e stoane, was ter wal meer commotie oaver ewes. De politiek was ter vaste boaven op gesprongen. De politiek, wie hebt ze nog weinig geheurt en zeker niet oaver dissen boom. Ja, eene pertieë hef het naamplaatje veilig gesteld. De boom is niet meer te redden, maar het Battems gemeentelijk niejs in de Battemse krante det kan. De gemeentelijke bijdrage diet de Battemmers doaran geeft, hooft niet noar de Stedendriehoek. Ook al gif het wat extra kosten, dan nog, Battums niejs in de Battumse krante. Verget niet te stemmen.

Lettele kan der maar niet genog van kriegen. Wekkenlang waren ze in het niejs met superkoe Hermien, diet as ne dollen stier deur de bossen van het Oostermoat denderen. Zie haalden der gen medaille met, alleen het landelijke niejs. Inmiddels zit Hermien met eur zuster in een rusthuus. Kon het het eindelijk, as vanolds, rustig worden in het rustieke Lettele, haalt ze in één keer weer alle landelijke dagbladen met de denderende golden rit van Carlijn Achtereekte. Olympisch kampioen op de 3000 meter. Lees verder →

Doar waren twei bèume in Battum, met een verhaal. ‘N èèrsten, den ôôlden Lindebôôm van Leny en den anderen, woet det magere keerltje boaven in zat. Gelukkig, biej het rond goan deur Battum zag ik ik ’n eersten nog stoan. Mà vieftig meter veerderop scheet oe de troanen in de oogen, àj zeet dat den magischen grooten kastanje der neet meer steet. Lees verder →

Hallo, hier radio “De zwarte Nagtegaal.” Het breg mie trugge noar lang vervleuigen tieden. Doar was gen mobieltje, nen enkele telefoon en gen tillevisie. Het enige spannende op de radio, waren de geheime zenders. Op de zundagmorgen zaten wie an de radio gekluusterd, um veural toch maar niks te missen en dan kraakten het deur de ether. Hallo hier radio “de Zwarte Nagtegaal”, met een verzoekplaatje veur tante Jo uut de Schoolstroate, die vandaage tachtig is e worden. Speciaal veur eur het machtige liedje, de diligence. Net as het plaatje begint, kump ter een enorm geruus op de radio. Storing van hier tut Tokio. Ie heurt niks meer en de Zwarte Nagtegaal is neet meer te bereiken. Det gedoe met die geheime zenders is neet meer wat het in die vieftiger, zestiger joaren is ewes. De meugelijkheden bint noe ook völle meer geworden. Toch is het bes mooi um een olderwetse plaate an te vroagen. Het kan nog altied. Één van de vroggere geheime zenders, zat verstopt argens in de buutengebieden van Lochem, Vorden en Ruurlo. Teegenswoorig bint ze helemoale legaal en iedere zundagmorgen van negen tut eene dreijt ze verzoekplaten in het programma, op de koffie bie. Oaver de kwaliteit hoof ie niet in te zitten. Zie komt luud en duudelijk oaver. Het bint allemoale vriewilligers. Het zol mooi weazen as wie ze verrast met ne stormvloed an verzoekplaten. Belt 0575-556560 of stuurt een berichtje noar info@achterhoekfm.nl. Ie zult zeen det ie der schik an kriegt en ie doot er ook nog mensen een plezeer met. Netuurlijk niet allemoale, de diligence, ok de platen van Boh foi toch, Normaal en de Beatels hebt ze vaste wal in hun repertoire. En dan zundagmorgen lustern op www.achterhoekfm.nl  of oen verzoekplaatje der bie zit. Völle wille.

Het is toch wat, zo maar op zien olde dag krig Herman van de Ossekop ne kouw noar zich verneumd. Joarenlang ging het beesje deur het leaven as Joke 18. Net op het moment det ze de wagen in mos, um het tijdelijke veur het eeuwige te verwisselen, nemp ze de kuierlatten. Lees verder →

Het gesprek van de ofgelopen wekke is wis en waarachtig wa de wind ewes. Iedereene hef ter zien portie van met ekregen. Zelf stun ik ’s mäns op en dache bie miezelf, het völt nog wa met. Det wörden rap anders. Hoe langer hoe harder kwam de wind anroaz’n oaver de kaale weide. In één keer zat ie der midden in. Het eerste wat er sneuvelen was de schutting en het veugelhuuske. Lees verder →