Ie ontkomt er neet an. ’S Oamds laate riej’ op huus an noa, wier ne môôi’n harfsdag. Röstig harfsweer, iets te röstig. Wiej möt oppass’n daw we neet zô van de noazommer de winter in duukelt. Sjonge jonge, wat duuster. As de moane zich èèm’n löt zeen kiek oaver ne grieze dekk’n de wèid’ns in.

Lees verder →

Hèèl Battem is ter drôk met. De eene helfte duk de kaste in of maakt de zoolder schôône. De ààndere helfte poetst de trekker op. Vuur beire is wat te zegg’n. Het is wier zo veer. Alle oaverboodige dinge bint an de weg ezet en op ehaalt. Zoaterdag köj ‘t bekiek’n en trugge kôôp’n. Det doo we met mekaar à joar’n en zô gèève wiej joar in joar uut, an de goeie doel’n. Ieder joar kiek ie of ter ôk spul is, dej’ wà könt miss’n en ieder joar kôm ie wier in huus met vanalles, wàj’ dan wier netjes biej de kollektie zet. Ieder joar kriej’ de bosschôp met, van kôôpt neet te völle, want ie hebt à zô völle kroam. Mèèstal is het tèèng’n dôôvemansoor’n ezeg en an ‘n eine van ’n dag steet er wier een machtig bord of ne schilderieje van ne Battemsen schilder biej oe op ‘t kantoor. Völle heij’ der neet an, mar het is vuur het goeie doel. Ankômmenden zoaterdag, de Battemse boeldag, ’s männs à vrog langs de kreuime snoem’n, um der van alles tuss’n uut te viss’n vuur ne schappelijke pries. Èèm’n kiek’n wat er àmoal in de veiling zit. Ie zeet er ieder joar wier noar uut. Het bèèd’n op die môôie klokke of die ôôle melkbusse, diej’ met Niejjoar wa könt gebruuk’n vuur het carbid scheet’n. Ie kiekt oe ieder joar de ôôg’n uut, woer de lèu met op huus an slept. Het is ne kick, zo gauw àj’ de manege binn’n kômt, kriej’ de lôch van olieboll’n, met peerdemest in de nèuze. Wat een volk en wat een stemming. Jong en ôôld kump mekaa tèèng’n op de boeldag. De stemming is ter ééne van ôôns kèènt ôôns. Lekker, wiej meugt er wier noar uutkiek’n. Vuur iedereene lig ter wà wat tuss’n um de vrouwe of oe zelf met te verrass’n. Môch ie noe hèèmoa niks könn’n vind’n, dan pak ie gewoon ne buul met olieboll’n. Àmoa tut ’n zoaterdag en dèènk ter umme, het is vuur het goeie doel. As ne strèèpe noar de boeldag.

Ôôit wörd’n miej de leefde vuur het làànd van Heuvel in e gèèm’n duur mèister Hoefman van de Ulo schoole in Hoolt’n. Hij kwam van Loarne. As ter tied oaver was, lèèz’n e vuur uut zien book, “Ôôld Achterhooks boer’nlèèm’n”, det zich ofspöll’n rôôndumme Loarne. Van de wekke gunge wiej doar kiek’n op het ôôle kasteel van Oolde.

Lees verder →

Doar bint van die doatems die verget ie nôôit meer. Twaalf honderd dôôi’n, jonge mèèns’n, zô mà, kinder, bäbies, willekuurig kepot emaakt. De schrik slöt oe um ’t harte. Dit zal gevolg’n hemm’n. Dit löt een làànd neet zô mar an zich vuurbiej goan. Wiej bint een joar en vèèrtig duuzend slachtoffers veerder en het geet mà vedan. Alle männde kiek ie noar ’t niejs en ie hopt det er goeie bericht’n bint. Verget ’t mà, moord, dôôdslag en ellende. Alle daag’n proat de specialist’n met mekaa, vanuut ne veiligen stool, det ’t zinlôôs is. Het geet mà duur en de gewoone man möt liëd’n ôônder al det bruute geweeld. Gaza lig à kàànt in puun en noe geet de miljoen’nstad Beiroet ten ôônder. Ie könt er met oen verstàànd neet biej. Nog altied wördt er vanuut Gaza en Libanon eschött’n. Hoe lange stoat de machtigen nog langs de kàànte. Ie hôôlt oen harte vaste. Ôôndertuss’n is Rutte van de Navo met een lachend gezichte in Oekraïne. Hij stek Zelinsky ne veere in de kôônte en hopt det e gauw biej de Navo zit. Is det nen uutweg noar vrèè? Àj’t gelèum’n meugt, ôk doar alle daag’n duuzend dôôi’n. An de ééne kàànte valt ze Ruslàànd binn’n en an de ààndere kàànte rukt Ruslàànd veerder en veerder op. Wiej zeet niks ààns as plaats’n diet kàànt kepot bint eschött’n. Ôôndertuss’n is het antal mèèns’n wat op drif is neet meer te behapp’n. Het nieje kabinet is ter noe honderd daage en het zit neet ech stèèvig in mekaa. Yesilgöz en Halsema rollebolt met mekaar oaver het net en stoat rech tèèngoaver mekaa. As noe in ôôns làànd de vroole mekaar ôk à neet wèèt te vind’n, is ’t hekke van Amsterdam. Minister Faber geet ôôndertuss’n as nen olifant duur de porseleinkaste. Nôôd brek wet, allèène, in Den Haag stoat neet alle nèuz’n dezelfde kàànte uut. Hoe lange geet disse soap nog vedan. Het is arger as daw we in de gaat’n hebt. In Uuropa kump de wind meer en meer uut ’n rechter hook. Doar möt wat verààndern. De vluchteling’nstroom möt stopp’n. Hoe dan? Wiej wilt zo geerne oplössing’n.

Zô mar in één kèèr en wat veul ie oe dan ôôld. Toch mar èèm’n den strieker bell’n, zörg’n dàj’ der in ieder geval alles an doot. Karms’n moandag, acht uur, het was de enigste tied det e nog vriej was, toch mà goan.

Lees verder →

Gelukkig blif het hier biej een waterig zunneke, met of en touw ne beste bujje. Vannach drèum’n ik det het water biej ôôns noar binn’n gulp’n. Biej één van die korte felle rèèng’nbujj’n zag ie het van de weg of, de weire in lôôp’n. Ie realiseerd’n oe det as det twei daag’n vedan zôl goan, dàj’ de veute neet drèuge heuld’n. De oavergàànk van de zommer noar de harfs is in ezet. Misschien nog ééne stoeptrekking en het zommer is vuurgood vuurbiej.

Lees verder →

Gisteroamd trök de vrouwe de gerdien’n dichte, noa ne môôi’n zundag. Lekker geniet’n op een terrasje, biej een kôôld zommers biertje. De hette is vuurbiej. ‘N lest’n zommerdag? Nog èèm’n en de temperatuur zakt ôônder de twintig groad’n. De tied van körter word’nde daag’n kômt er an.

Lees verder →

De vakàànties zit er op. An ’t wark, trugge in de sluur van alle dag en doar is is èigelijk niks mis met. Völle is ter neet gebuurd in ôôns darp. Wat det betreft goaw we de goeie kàànte op. Hoezô, nôh kômm’nde wekke heiw we september en dan begint vuur ôôns de belangriekste feest’n.

Lees verder →

Het zat er an te kômm’n, mà toch kwam ’t nog onverwachs. President Biden trek zich trugge uut de race um ‘t presidentsschap. Het is te hopp’n det Amerika noe ôk wakker wördt en zich as een blok achter de nieje kandidaat stelt, mà det is nog mà wier ofwacht’n. Wat is det toch, det ze zô weg lôôpt met Trump?

Lees verder →

Hèèl Uuropa dut met. Det wil zegg’n de vèèr starkste làànd’n nog. De eene kèèr wint rechts en in ààndere làànd’n is ‘t net àànsumme. Het geet lekker. Met ne machtigen eindsprint blèèf Groeneweeg’n al die ààndere snelheidsduuvels vuur. Ôk ôônze voetballers blieft nog èèm’n in Duutslàànd. In ne môôie pot trök de Nederlààndse Leeuw an ’t langste èine tèèg’n Turkije.

Lees verder →