Plan De Brink
Klik hier om de 3D animatie te bekijken

Vertrouw ie de bàànke

en de overheid?

Èaven noar de banke, kieken noar die mensen, diet veur oe an het wark bint. Bankzaken ofhandelen an de balie. Het is niet meer en het vertrouwen is veer te zeuken. Het enige waj’ nog kunt, is pinnen. Zelfs det is mangs niet veur mekaa. Zorgt er veur dat det vertrouwen trugge komt. Het is balen van slogans as, pasop, klik weg en belt noar Deaventer, ie wordt er niet goed van.

Van de wekke kon ie in één keer neet meer bankieren. De computer was te old, dus weer ne nieje investering. Het is de umgekeerde wereld. Ie mot an de studie op ne nieje computer um te leren bankieren. De rente daalt weer veerder onder het procent, maar de bàànke dreijt as ne tierelier. Ie meugt zeker blie weazen daj’ nog rente kriegt?! Nog eaven en ie magt betalen, aj’ oen spoarcentjes noar de banke brengt. Loat ze is goan beleggen, met een garantie veur spoarders. Ie kriegt meer en meer het geveul, det de specialisten winst maakt oaver de rugge van Jan met de korte achternaam. Betalen mag ie trouwens toch al, want de belasting geet er vanuut det wie nog altied vier procent maakt. Het is van de gekke en de ontevrèèdenheid wordt alleene mar meer. De telefoon is ôk al leavensgeveuirlijk. Ie mot good oppassen, daj’ niet wat verkeerd indrukt, anders dan bin ie de klos en schrieft ze zo maar vanalles van oen rekkening. Zie goat er vanuut det iedereene de weg kan vind’n op de digitale snelweg. Wie bint met zien allen van het normale padje of. Vertrouwen in Den Haag, vertrouwen in de bàànke? Zie doot àmoa net wat eur in de kroam te passe kump, in plaatse van luustern noar klanten of kiezers.

Het zwarte schoap.