Achtbaane

De achtbaane kump tut stilstàànd. Vandaage zes januari. Nog een betje verdwaasd kiek ie noar buut’n. De schnèè is vôt. ’N èèrst’n december biej’ in estapt. De advent is begunn’n. Sunterkloas stun vuur de duure. Het lik à wier nen eeuwighèid elèène. Zelf heij’ ’n midwinterhoorn van de spieker ehaalt.

Ie bloast de èèrste onwennige toon’n de wereld in. De buur’n wèèt wier dàj wakker bint. Umdàj’ zelf dèènkt det ’t môôi klinkt, bloas ie mà ne kèèr ’s oamds um elf uur. Ie hebt neet in de gaat’n det ze vieftig meter veerder rechtop in berre zit. Denzelfd’n ôôld’n roop breg ne hôôp lèu plezèèr en ie kômt nog is äns. De achtbaane brach ôôns noar de herdertjestocht. Waterkôôld en duuster weer, det is waw we völle hebt ehad in de decembermoand. Ie zeet det engeltje doar wier zing’n, boam’n in den hoogwarker en dan den herder den doar stun te kôôldviestern in den stal van Betlehem. Zie doot ’t toch mà, dèènk ie biej oe zelf, met op de achtergrôônd het Engelengezang. Ne jägermeister dut wôôndern en voldoane goaj’ op huus an. Een dag of wat later stoaj’ te bloaz’n op de Bannink, slech weer biej de midwinter wandeling van de Ôôldheidkundige kring. Het mag de pret neet drukk’n. Op noar de Karsdaag’n. Lekker, met de neuiste femilie, geniet’n van al het goeie wat het joar hef ebrach. Neet te völle dèènk’n an de narighèid. Op dartig december nog èèm’n met de heurns noar ’t Dijkhuis. Wat is det toch det de lèu doar zô van könt geniet’n? Is het den roop, um de wereld te verlöss’n van narighèid en verdreet? ’N Körtst’n dag zit er op, gelukkig, op noar het vuurjoar, mar èèrs nog èèm’n ôôld en niej. Ôôlejoarsoamd, het gescheet is neet van de lôch, met as hèugtepunt, ’s nachts noar Niejjoarsdag. Niejjoarsdag, het zelfde laak’n en pak, wier rèèng’n. De schreeuw um lech wördt starker en starker en dan heiw we schnèè. Hèèmoa ne witte wereld, jammer het is mà ne halm’n dag en dan stoa we wier te bloaz’n in de stromende rèèng’n. Vandaage, drei Koning’n, gries weer, nog één kèèr en dan geet den heurn an de spieker. Het lèèm’n roast vedan met alle wille en verdreet. Doar is gen hôôl’n an. Wiej begint an een niej joar, 2025, met doarbiej de allerbeste wèèns’n.