Plan De Brink
Klik hier om de 3D animatie te bekijken

Achteruut boer’n is ôk boer’n


Det ôôle gezegde heul miej bèèzig biej een rondje langs de Poasvèur’n. Ja lèu, het zunneke schient en de eiernetjes bint uut het vet. Palmpoas’n, Poas’n, het vuurjoar kump ter an. De tied nèimp miej met noar lang elèène. In één kèèr zit ie wier op oen fietske, met een rammelend kisje met fleskes, oonder de snelbinders.

Melkmôônsters nemm’n, ’s männs um half zesse uut de veer’n, duur weer en wind, ie möt er noe neet meer an dèènk’n. Gelukkig doar wadd’n gen boer’n met honderd en twintig beeste. Nee, ‘n grötst’n had er zestiene, met twei man melk’n, altied nog twei uur stoan kôôldviestern in ne tochtigen stal. Àj’ der wat langer oaver noadèènkt, besef ie det er van al die boer’n, noe praktisch gen eene meer ôônder de beeste zit te trekk’n. Al die kleine boer’n, drei, vèèr beeste of een stuk of twaalme, zie bint àmoal estopt of hebt zich in wat ààns specialisèèrt. Van iedere tien boer’n is ter misschien eene oaver eblèèm’n. De roewe weid’ns met zuring en dissels, ie zeet ze neet meer. De lèu, met ’n zèis’n op ’n nekk’n, vuur ne dag ôônderweg, um een stukske lös te maak’n, woer bint ze blèèm’n? Het bint noe àmoa gazons en één kèèr in de zô völle tied vlug ter ne trekker oaver hen um het weelderige grös te mèèi’n en op te zoeg’n. Het is gen kwestie meer van daag’n, mà van uur’n. De tied is völle jachtiger ewörd’n. Èèm’n uutbloaz’n en kèww’n op ne proeme tabak, het is ter neet meer biej. Hebt ze ’t noe better as in die vroggere joar’n? Ik dèènk ’t neet, zie hadd’n àmoa ne boterham en ne kômme koffie met een dik vel der op. Trugge noar tien beesjes en drei schötte met vark’ns, het zit er neet meer in. Ééne vôôgelklarre op ne bunder grôônd is à te völle vuur ôônze natuur. Met an mekaar geknepp’n bill’n zeej’ de vôôgels noar de buur’n vleeg’n um doar de grôônd te bemest’n. Pas op, dàj’ ôônderweg gen zunnepaneel raakt. Och, het gif neet, achteruut boer’n is ôk boer’n. Het zunneke schient en ’t oop’n wekke zölt de boakes wier bràànd’n.