Bathmensekrant.nl is een uitgave van Artzet Media en heeft als doelstelling het dagelijks nieuws uit het verspreidingsgebied van de Bathmense Krant te brengen in de vorm van een online krant.

An de hand van Blauwhand

Eaven noar een lezing in Harfsen oaver Meister Hendrik Willem Heuvel. Disse boerenjonge, geboren op Blauwhand bie Loarne, hef ons het prachtige book, “Oud Achterhoeks Boerenleven” noa geloaten. De Heer Wagenvoorde van de Loarnse Heuvelstichting kon der machtig oaver vertellen. Hij nam ons met noar tieden lang geleden.In 1831 vocht eenen Koerselman met Prins Willem van Oranje, in de Tiendaagse Veldtocht. Het was de Broabantse oorlog, woet völle jongens uut disse umgeving hebt meegevochten. Zes joar bleef hij in dienst en toen kwam hij, in zes daage, vanof Maastricht trugge loopen noar Loarne. Althans bienoa. Duur oaververmeuidheid strandden hij vlakbie huus op de Gorsselse heide. Doar worden hij gevunden deur Koelman, de opa van Hendrik Willem Heuvel. Die brach hem, oaver de Bielderweg, veilig terugge noar Loarne. Zo ontstund er ne vriendschap tussen de beide families, diet generaties zol duren. Heuvel, geboren in 1862, hef ons disse verhalen noa geloaten. Met name dit verhaal trök mien andach, umdet er ook jongens uut het Battemse hebt gevöchten in dezelfde oorlog as Koerselman. Zo vunden wie op Goldenbelt nen oorkonde met de verdiensten van Haar Hendriks in diezelfde veldtocht. Ie kunt het oe neet veurstellen. Die jongens gingen van huus of, zonder telefoon, auto’s en tillevisie. Niks van det alles was ter. Moandenlang heuren ie heelemoal niks en dan kon het zo maar weazen det ze van de eene op de andere dag veur de duure stunnen. Veur eaven terugge noar de tied det er nog gen lawaai was te heuren van stoomtreinen, auto’s. vliegtuugen en de A 1. Wat zal det ne zalige stilte weren gewest, met zo of en touw het loeien van ne koo en het heuren van een veurbie goand peerd. In het leaven van Heuvel zol det allemoale veranderen. Hij mos ter echt an wennen en beschrif het geluud van den stoomtrein as een dreigend monster in de veerten. De tied vleug veurbie en nog in gedachten reed ik, oaver de Bielderweg, weer op huus an.