Plan De Brink
Klik hier om de 3D animatie te bekijken

Anschoem’n biej Schoof

Inmiddels is Het teuirntje leuig. As ‘t good is heiw we de nieje ploeg op ’t bordes zeen stoan. Het zal èèm’n wenn’n wèèr, gen lachende Rutte, diet op de fietse noar huus geet. Nee, ne compleet ààndere ploeg, diet het àmoal ààns goat doon.

Wiej hebt er met zien all’n vanals oaver könn’n zegg’n. Van het wörd niks tut het wörd’n tied. Loaw we ze de kààns gèèm’n. Schoof, met de halve direktie van “Ongeheurd niejs” en het allerstrengste asielbeleid ôôit. Ie heul’n ’t neet vuur mèugelijk! Mar ôk zie hebt nog ààndere zaak’n op te löss’n. De toeslaag’naffaire en Groning’n hangt ôk nog altied as ne lôôi’n las um de schoolders van ôônze nieje bestuurders. Streng mà rechtvaardig, wiej zölt het neet vergett’n. En noe, an ‘t wark. Ôôndertuss’n bint er vuur ôôns nog genog ààndere dinge um biej an te schoem’n. Wat det angeet köj’ de politiek miss’n as tààndzeerte. Het Uuropees kampioenschap voetbal wördt als mà spannender. Nederlàànd wint met twei vingers in de nèuze van Roemenië. Det möt ôk, um de schàànne van Ôôst’nriek weg te poets’n. Ho, ho vuurzichtig an, heur ‘k oe dèènk’n. Nôh at ze det neet wint hebt ze der ôk niks meer te zeuk’n. Ôôndertuss’n bint ze vanuut Italië, inmiddels in Frankriek an ekömm’n. Neet Garribaldi, mà de Ronde van Fràànkriek. Hèèle volksstamm’n hebt de lieskes in e vult en noe mà ofwach’n of oene favoriet’n het warkelijk zô good doot. Het môôie is det er altied wier nieje sterr’n opstoat. Loaw we hopp’n dat det in de politiek ôk gebuurd en det ze neet rollebollend van het bordes of kômt. Tied vuur nen ààndere wind of alle veraàndern is gen verbettern. Het steet in de sterr’n. Àj’ al die drôkte èèm’n achter oe wilt loat’n pak ie het èèrste de beste vliegtuug noar Veerweggistan um oene zinn’n te verzett’n. Wàj’ ôk doot, het lèèm’n geet zien eeg’n weg. Oaver drei wekke is diss’n armood àmoal achter de rugge, mà loaw we hopp’n det het kabinet der dan nog zit en det de Tweede Kamer der een betje an gewèènd is. Spannende tied’n in nen onröstige wereld , wiej wacht ’t of.