Bathmensekrant.nl is een uitgave van Artzet Media en heeft als doelstelling het dagelijks nieuws uit het verspreidingsgebied van de Bathmense Krant te brengen in de vorm van een online krant.

Battemse karmse

Oaver veertien daage zit het er al wier op, de Battemse karmse. Vuur 478 ste kèèr. Een begrip in de hèèle regio. Wiej kunt er ons noe al op verspits’n, maar leest good de huusregels noa, want ie meugt er neet hen in het zwart witte shirt van ABS, ook kleere en alle andere clubgerelateerde artikelen kun ie better in huus loaten. Helemoal gen punt, ie goat er hen um wille te maken. Det moet lukken, doar is genog te doen.Ie doot de ogen dichte en ie zeet de karmse in volle glorie. Orpheus diet het lech an dut, het grote plein bie Boode veur, het terras bie de Brink, de oaverdekte weg bie het Café en doar tussendeur al die kermisattracties. Duuzenden zult ons Darp wier andoon um te genieten van die oolderwetse sfeer. Het geet te veer um alles te beneumen, ie moet het zelf maar is een keer, of wier beleaven. Veur de Battemmers en al die andere leefhebbers is de moandag de dag um mekaar is weer in de ogen te kieken. Eaven een joar bie kletsen, drankje der bie, de zörgen eaven vergetten en oen onderdompelen in de Battemse karmse. Speciaal veur de senioren onder ons bint er, in het Kultuurhuus zundagmorgen de Langenbarger met de Bekkezangers en op moandagmorgen is ter, vanof 11 uur, muziek met de ‘Zusters van de Buren.’ Netuurlijk is ter vuur alle leeftiedsgroepen oaveral genog te doon. Kiekt er het programma maar op noa en maakt zelf oen keuzes. Hebt schik met mekaa, het allermeuiste is at ook de organisatie met plezeer terugge kan kieken op ne mooie karmse. Netuurlijk heb ik mien pak al vaste uut de mottenballen gehaald, want de Battemse karmse wil gen mense missen. Ik hoppe wal det iemand anders moandagoavond het lech uut dut.