Betaald voetbal

Het kleine manneke is zes joar geworden en sinds een moand of wat zit e op de voetbal. Netuurlijk heb ie as opa hem de allereerste beginselen bie gebracht. Noe spölt e met in de competitie. Het allermooiste is at det keerltje dan ne goal maakt. Ie geeft hem een eurootje en hij is ter blie met. Ie hadden hem net zo good een dubbeltje kunnen geven, alhoewel, hij leert snel. Hij is ter zelfs zo veer met dat e hoaste iedere wekke een doelpuntje maakt.Ie zölt begriepen dat dus al die keren de knippe getrökken möt worden. Ie kunt het kleinere zuske der neet bie loaten stoan en zie krig hetzelfde umdet ze zo leef is. Het is altied wier mooi um die glinsterende eugjes te zeen at ze het nieje kapitaal in bewaring geeft bie pappa. Afgeloopen zoaterdag was ter weer e scoort en ik kreege berich van det heugelijke feit. Ik heb direkt gebeld det de beloning vuur hem kloar lag. ’S Oamds een verontrustend berich, de kleine jonge stun op de oaverloop. Hij had naar e dreumt. Opa moest al weer betalen en det was toch wel zielig. Getreust deur mamma, det opa direkt nog niet zonder centjes zat, gung hij weer noar zien bedje. De kindergedach’n bint nog zo puur en onzelfzuchtig. In het groote mensenleaven is det vaake wal anders. Doar geet het vaake um, ikke, ikke, ikke en de rest kan stikken. Vandaage of morgen zal hij zien muntje wal kommen halen. Ie geeft het met leefde, ook al was het, het allerleste. Kleine kinder, geniet er van, vuur dat ie der arg in hebt wordt ze net zo as in de groote mensenwereld.