Bliej met kleine dinge

Hoe simpel kan het leaven weazen. De agenda is leuig. Neet meer noar de fysio, gen blood prikken, gen tandarts. Ie magt het huus alleene nog maar uut veur de bosschôppen. Helemoal terugge getrökken op het eegen arf.

In de wetenschap dat ie oe gelukkig meugt priezen, dat er de ruumte is veur een betje tuinieren, grös meijen en varven. Allemoal karweitjes, diet nog wal is uutgesteld wordt. De aardbeienplantjes stoat er inmiddels weer deftig bie en de smallook is dratisch uutgedund. Bieslook, zo’n simpel plantje. Wat doot ie met het overtollige? Noe is ons van huus uut met gegeven, dat er niks mag worden weg gegooid. Dus een appje noar de femilie en het was maar eaven of de eerste bestellingen kwammen binnen. De rest wollen wie nog an de weg zetten, maar zo ver kwam het niet. Alles hef een niej pleitske en iedereene kan genieten van smallook bie de sloat. As greunte is het hatstekke lekker. Wis ie trouwens det het good is veur te hoge bloeddruk? Het bint de kleine dinge. Niet maar zo alles weggooien. Zet het langs de weg, met een vrije gift of ne kleine vergoeding veur de kinder. Vedan leaven en niet heele dagen lusteren noar al det corona-niejs. Ie wordt er op het laatst compleet gestoord van. De vakantie veur dit joar is geregeld. Met de bus noar Duutsland gung neet deur en dus hebbe wie een plekje besprökken an de Costa Gazona. Lekker uutrusten, een eindje wandelen en kieken of de aardbeien al bleuit. Een paar plantjes kopen, um het geheel in de tuin, op het terras of balkon een betje kleur te geven. De anderhalve meter regel wordt als maar moeilijker. Zo of en touw fietst er weer groepjes oaver de weg. Het is begriepelijk, maar loat wie toch met zien allen nog eaven volholden, zodat er later dit joar veur iedereene ruumte is um weer mooie dinge te goan doon. Wèèst noe blie met kleine dinge.