Plan De Brink
Klik hier om de 3D animatie te bekijken

Boekpiene

Zo de Poasvuren bint wier allemoale eaven groot. Zie rookt nog een betje noa. De eier bint op en ook de restjes van de Poasmoaltied heiw we noar binnen ewarkt. De lucht van het verbrande holt is weg etrökken. De vervuiling is veurbie. Was het maar woar. Het joar is al weer veur een kwart um evleugen.De nieje roadsleden bint druk an het wark. De wereld raost, zonder umme te kieken, vedan. Het vedreet is alle dagen um ons hen, ondanks het herdenken van de wederopstanding. Onumkeerbaar begint wie an het tweede kwartaal. Wat zal het brengen? Gen eene weet wat leven is, alleene det het gegeven is, zei mien olde grotmoo zaliger. Hoe langer of ie rondloopt op dissen aardkloot, hoe meer of ie in de gaten kriegt det ze geliek hef. De eerste merels bint an het nestelen. Hoe drok kunt die veugeltjes toch weazen met hun nieuwe huuske. Doar umme hen vlug de markolle. Gelukkig weet den merel neet, woer ik bange veur binne. In de groote mensenwereld geet het niks better. Wie hebt van nature mee gekregen det wie kunt denken en veuruut kieken. Jammer genog doot wie doar niet alleene goeie dinge met. De mens, het grootste roofdier van de wereld, maakt, noar alles wat er al gebeurd is, nog altied meer kapot as det ons leef is. Wat is det toch, die zucht noar macht en anzeen. Veur gewone starvelingen blif het moeilijk te begriepen. Wie goat vedan, op noar Hemelvaart en Pinksteren. Genieten van de mooie dinge, metleavend met de mensen diet verdreet hebt. Niet te völle denken an wat die markolle ons allemoale kan andoon. Ie kunt niet alle dagen met boekpiene rond lopen.