Boks’nmoal

Netuurlijk bint er nog leu diet wèèt wat det is, toch heur ie der vandaage an ’n dag neet meer van. Ieder joar at de trouwdag vuurbiej kump stoaj’ der èèm’n biej stille. De tied vlug en ie dèènkt èèm’n trugge. Noa tien joar verloofd! Ôk neet meer van disse tied.

Tèèngswoorig trekt ze noa ne moand of wat à biej mekaar in. Noa de verloving, een good joar later, in eschrèèm’n. Der kwam nog ôôlderwets, boks’nmoal. Een feesje met de neuiste femilie, vrindinn’n en kammereui. Neet in ne grôôte zaal mar biej de uutverkorene op de delle. Een ofschèid van het vriejgezell’nlèèm’n en de vuurbereiding op het getrouwd wèèr. Noe bienoa nen halven eeuw veerder zeej’ hoevölle of ter verààndert is. De boer’n bint bienoa àmoa vertrökk’n. Op det plattelàànd wont àmoa vôôgels van van verschillende pluimage. Ie betrapt er oezelf op, dàj’ ze neet àmoa meer kent. Umgekèèrd zal det wal hetzelfde wèèr. Iedereene lèèft meer op zich zelf. Geneene hef ter tied meer. Het lèèm’n is völle jachtiger ewörd’n. Zag ie in die vroggere joar’n nog boer’n diet met ne zèis’n op de nekke noar de heuiwèire gung’n, het is neet meer. Ie zeet noe de jonge boer’n met krach en geweeld de wèire in goan met grôôte mèèimechien’n en een uur later ligt er een paar bunder plat. Lös heui, verget ’t mà. Baaltjes maak’n, het is zô good as uut de tied. Het geet de koele in. Zô völle is ter in nen kort’n tied verààndert. Verloving, boks’nmoal, getrouwd, de tied vlug. Goat mar is de buurte roônd en ie zeet det er völle vuur good weg is. Kiekt nog mar is in oen trouwalbum van zô völle joar trugge. Zô völle goeie bekèènd’n bint goan hemeln. Ie wèèt det ’t nôôit meer trugge kump en doarumme, geniet van alle daag’n, geniet van ’t lèèm’n. Boks’nmoal een onvergettelijk feest.