Column: Völle schoem en ne nieje lieste
Netuurlijk, zoaterdagmiddag èèm’n kiek’n op de Battumse karmse. Ech drôk is ’t nog neet, toch kôm ie der drek bekèènd’n tèèg’n. De lieste van de BBB vuur de tweede Kamerverkiezing wördt gepresentèèrd biej Boode. Nummer vieftig, nôôit van eheurt, mà zô of en touw ééne den ’t bekèènder is.
Indrukwekkend, zô völle verschillende ambacht’n of ter, uut alle loag’n van de bevolking en alle heuke van ôôns làànd, vuurbiejkômt. Àmoa kriegt ze, tuss’n de karms’ngeluud’n duur, het woord, um te vertell’n, hoe good of ze ’t met ôôns vuur hebt. Zô völle verschillende mèèns’n en waarachtig, doar zit ôk een stuk of wat boer’n tuss’n. De provincies bint good vertegenwoordigd en den rasecht’n Amsterdammer, mar ôj’ doar noe nog zo grèuts op möt weer? De zwoargewicht’n op de lieste kômt as leste an de buurte. Derk Jan Eppink uut ’n Achterhook is van alle karms’n thuus, Mona Keizer wèèt ôk wat feest’n is. Ôônz’n eeg’n Erik Stegink steet as nen echt’n vuurzitter vuur de troep’n en geet er veur. Netuurlijk is de lieste pas ech compleet as ôk Caroline van der Plas eur plaatse op ’t toneel hef e vund’n. Zie hef ter zin in. Loat ze mà lach’n, heur j’ eur zegg’n. De lieste is compleet. Loat 22 november mà kômm’n. Ie proat nog èèm’n noa met den Amsterdammer en de dame met die môôie dôônkerbroene stemme uut Broabàànt. Noe mà hopp’n det ze een plèitske kan bemachtigen in die slang’nkoele van Den Haag. Zelf zeuk ie oen’n weg noar buut’n, woer de lèu wà wat ààns an de kop hebt. Ie schudt nog èèm’n de hàànd van den Achterhooker. Fijn, dàj’ in de moodertaal könt proat’n met zun man.”Good goan” en doar geet e, tuss’n alle feestgangers duur, op huus an. Mill’n tuss’n de kreuime steet Caroline van der Plas te klasjenèèr’n met de NOS. Zie veult zich thuus en blif zichzelf. Ôôndertuss’n hebt de kleintjes gen benul van wat er àmoal um eur hen gebuurd. Zie geniet volop, zôônder zörgen, van het môôie weer en het schoem. Zo heurt ’t ôk. De zörgen bint vuur de ôôld’n. Twei en twintig november, winst of verlees, mà wà goan stemm’n.