De Battemse Karmse geet deur

Wie bint toch mar is eaven weer op ne verjeuirdag gewest. Netuurlijk, netjes buuten in de tuin, op anderhalven meter ofstand. Met het heete weer van de leste wekke lukten det prima. Touw gegeven, de consumpties en de paling bleven neet op die anderhalve meter.

Het eerste niejs wat wie heurden was, det de Battemse Karmse deur kon goan. De karmsenkeerls hebt greun lech gekregen en de organisatie kreeg gelieke nieje hoppe. Gelukkig, opa en oma meugt ook weer knuffelen met de kleinkinder. Eindelijk weer een betje normale touwstanden. Die anderhalve meter kump oe zo gangswieze de hals uut. Bie het oaverdenken van al die nieje moatregelen per 1 juli, kwammen der toch nog wel wat vroagteek’ns. De anderhalve meter regel blif nog altied in stand. Ie zeet het al veur oe, vaste looplienen, groote terrassen, mooi dorstig noajoarsweer en ie mag neet metzingen. Allemoal in ne riege, veur het huuske, met anderhalven meter der tussen. Ie zult maar neudig mötten. Het vargt heel wat discipline. Netuurlijk, wie wilt allemoal zo geerne, maar denkt de beslissers op het gemeentehuus doar ook zo oaver? Doar moet uuteindelijk de touwstemming vedan kommen. Het blif balanceren oaver een dun wiebelig koord. Veural as ter geruchten bint det virus nog lillijk in de buurte is. Ook de grote antallen besmettingen her en der in de wereld bint zörgelijk en vuur dat wie der arg in hebt kump het het weer binnen vleegen of rieden met al det vakantieverkeer. Loat wie hoppen det wie de zeekte de kommende drei moanden nog veerder achter ons loat. Hôôlt oe an de regels diet noe geldt, zodat wie in september weer ne normale Battemse Karmse kunt hebben, woet iedereene volop kan metzingen met de artiesten en de olde bekenden um de nekke kan vleegen, of tenminste ne hand kan geven.