De dokter kan mie nog meer vertellen

Maar noe eaven neet. Natuurlijk neet, Loo feest, eindelijk weer, noa twei joar ontbering. Het is vriedagoavond direct al genieten. De joarlijkse revue. Ne bomvolle tente. De leu bint met stomheid esloane. In al die joaren Loo, nog nooit zunne mooie veurstelling gezeene. Alles in de stijl van het weelde Westen. Onbegriepelijk, dat er dan leu bint diet wilt emigreren. Ja, veur sommigen is geld belangrieker dan geluk.

Zie komt trouwensvan ne kolde karmse terugge. Het golden klumpke wordt gevunden, maar de Indianen scheet met pijltjes. De sheriff hef helemoal niks onder controle. De Daltons komt in en uut het cachot. De barkeeper blik te kunnen zingen as een liester.Geveuirlijken Gait brek uut. Eaven word het stille in de zaal,as de doomie um de tente hen geet. As die goeie man in de buurte is, heult iedereene zich gedeist. Eaven mar en dan geet het in een vlot tempo vedan. Het is ne wisseling van zang, show en buurtproat. Groote kompelementen vuur Dinie, diet al sinds joar en dag, samen met al die vriewilligers, dit veur Loo op de planken zet. De oavond vlug veurbie en dat is maar good ook, want het is loeiheete binnen. Half tiene kan iedereene te tente ontvluchten. In de zwoelte van de oavond is het buuten good vol te holden. De bezeukers blieft nog lang noa genieten um de andere morgen al weer op tied bie de optocht te weazen. Altied weer indrukwekkend met het Loolied, “schoolslag en op de rug”. Direct noa het Wilhelmus kump de stoet op gang. Drei rondjes um de weide, met Orpheus veurop en dan weer noa de tente. De mensen geniet. Met de zeskamp is het peentjes zwetenen en ook de roofvogels hebt het onmeunig heete. Zundagmorgen, een geweldig ontbijt, pico model verzorgd, onder begeleiding van de Banjo-man. Dan löp heel Loo uut veur het schuttersscheeten. Uren later hebt ze eindelijk Koning Jelmer van de Blankenoa en Prins Lars van Kuut. Het weer is angenamer dan gisteren. Neet klagen oaver het weer, maar genieten tut de laatste muntjes en dan is het Loofeest weer veurbie. En de dokter? (wordt vervolgd)