De geweer’n zwiegt
Loaw we hopp’n dat det zô blif. Wat zal het oorverdôôvend stille wèèr in Gaza. Bezörgd sloaj’ de tillefoon lös. Tachtig dôôi’n in Columbia. Wat noe wier? Gelukkig, de èèrste drei Israelische gijzelaars bint vriej en ôk nèèngtig Palestijnse gevangenen. In de stroat’n van Gaza zeej’ feestende mèèns’n, tuss’n eindeloze puunhèupe.
Hé en ie zeet ineens suldoat’n van Hamas. Zie viert de oaverwinning, 46.000 slachtoffers. De geweer’n zwiegt, loaw we hopp’n dat det stàànd heult. Hoe zal het de kômmende daag’n veerder goan?. Ie zeet lange rieg’n vrachtwaag’ns noar binn’n ried’n. Het zut er good uut, mar het is àmoa nog zô wàànkel. Amerika wördt vandaage wakker. Zie kriegt de president dent ze zelf ekèuz’n hebt. Make America great again. Gen bestorming van het Capitool. Het zal toch neet? De bestormers van vèèr joar elèène wordt vriej eloat’n. Het rech van de heerser. Niks niejs, zelfs Biden gung doar in vuur. Vèèr joar Trump. Zet e Amerika en de rest van de Westerse wereld op de kaarte, of blös e de Navo op. De mèèst’n hebt er neet völle vedusie in. Het kan àmoa metvall’n. Uuropa kan der starker uut kômm’n. Met mekaa de bokse antrekk’n en ‘m zelf ophôôld’n. Gebruuk maak’n van de mèugelijkheed’n. Ôôndertuss’n geet Faber vedan met het allerstrengste asielbeleid. Groepsverkrachters wordt an e pakt. Links umme of rechts umme, doar môs wat gebuur’n. Hoe lange heult ’t stàànd? De situatie is nog neet ech ààns, mà doar wördt met ààndere ôôg’n noar ekekk’n. Ôk de stikstofprobleem’n wadd’n èèm’n wat noar de achtergrôônd edrukt, mà zie bint er nog altied. Loaw we hopp’n det er vuural ebouwd mag word’n en det ôônze jonge lèu wier an betaalbare wonning’n könt kômm’n. Loaw we hopp’n det Trump de vechtersbaaz’n in Oekraine en Ruslàànd an de toafel krig, zôdet ’t ôk doar röstig wördt. Doar steet nog ne hôôp te gebuur’n in dit nog zô prille joar. ‘N èèrst’n stap noa vrèè is e zat, mà wiej bint er nog lange neet. En in Battum is de mist een klein betje op e trök’n. Loaw we hopp’n det ’t een môôi vuurjoar wördt.