De knop umme en vedan

De vakàànties zit er op. An ’t wark, trugge in de sluur van alle dag en doar is is èigelijk niks mis met. Völle is ter neet gebuurd in ôôns darp. Wat det betreft goaw we de goeie kàànte op. Hoezô, nôh kômm’nde wekke heiw we september en dan begint vuur ôôns de belangriekste feest’n.

Èèrs meugt de Loarns’n lös. Det is pas ’t begin, de buur’n kômt er ne wekke later achter an en net as ààndere joar’n, in de leste volle wekke van september, Battemse karmse! Kortumme, reed’n genog um rap an ’t wark te goan en een paar stuuver te verdeen’n um te verteer’n met de karmse. Veerder is ter neet völle te vermeld’n. Een paar kèèr code oranje, mà gelukkig trökk’n de bujj’n zôônder al te völle schaa langs ôôns hen. Zelf heiw w’t lekker röstig an edoane. Wiej wadd’n à vrog op vakààntie ewes. Wiej hebt meug’n ervaar’n hoe môôi of ôôns eeg’n làànd is. Ech, ne Hollàànds’n zommer, met heete daag’n en onmeunige plensbujj’n. Gen las van drèugte, mà van nattighèid. Doar zit wat bèume slech in ’t blad. Het schient det ze te lange met de veute in ’t water stoat en doarduur gen lôch könt happ’n. Loaw we hopp’n det ze de boch duur kômt en ’t oop’n joar wier vol in ’t blad stoat. Ôôndertuss’n is ’t in de grôôte wereld neet völle better ewörd’n, eerder slechter. Oekraïne is Ruslàànd binn’n etrökk’n, noe bint er zelfs Russ’n op de vlucht. Woer det noar touw geet, het is koffiedik kiek’n. Ôk de bericht’n vanuut het Midden Ôôst’n bint veer van geröststellend. Het is te hopp’n det de bom neet hèèmoa barst, want dan is Hollàànd in las. Hollàànd, Den Haag, het kabinet is wier an ’t wark. Zie hebt de mobieltjes in de kaste gôôit en bint volop an ’t vergaadern. Noe mà hopp’n det ze biej de tweede kamer ôk nog een kabinet hebt um die telefoons in te stopp’n, want al die kamerleed’n, ôônderuut e zakt op de de telefoon, is gen geweldig vuurbeeld vuur ôônze jeugd. Veerder vuurzichtig, want de jeugd geet straks wier de weg op, noar schoole. Loaw we àmoa extra oppass’n, zôdet ze ôk veilig wier in huus kômt.