Plan De Brink
Klik hier om de 3D animatie te bekijken

De Perskoelers

Zoaterdagmiddag bint wie mar is richting Holten egoane. Neet dat det zo bezunder is, maar ons was ter ore ekommen det er nen carnavalsoptocht was. Dikke trui an, kieltje der oaver, de dasse umme en doar gung het hen. Hoe dichter of wie bie Hoolten kwammen, hoe warmer of het worden. Het kieltje en de dasse waren oaverbodig. Super lekker vuurjoarsweer.Uuteindelijk stunden wie, met duuzenden mensen in het zunneke, te kieken noar ne kilometers langen optocht. Ôônder al die wagens, ééne dent bezunder opvöl, de Prinsenwagen van de Perskoelers uut Colmschoate. Veur de allereerste keer deden zie met in de optocht van Hoolten. En ie weet het, as ter één wolf op de Veluwe is, dan komt er meer. De Perskoelers genötten, toen ze wörden herkend deur de Battemse Pompers, diet hun vaste stekkie weer op hadden gezocht bie de boerderij an de Dorpsstroate. Nee, wie waren niet de enige Battummers diet de weg hadden gevunden noar het Keunedarp. In het hele centrum was het noar ofloop ééne grote verkleedpartij en de mensen genötten van de gezelligheid in de diverse kroegjes. Wie hebt weer nen hoop olde bekenden de hand meugen drukken op dissen bezunderen zoaterdag. De Perskoelers uut Colmschoate en de Battumse Pompers kent de weg noar Holten. Zie hebt de preuve te pakken. Wie weet komt ze volgen joar wal met meerdere wagens en loopgroepen. Lekker met mekaa genieten van de geneuglijke Sallandse carnavalssfeer, of zollen ze toch nog de weg trugge vinden noar de Brink in het Stokvissengat. Ôk beregezellig, maar veur det het zo veer is mot er nog heel wat water deur den Iessel.