Plan De Brink
Klik hier om de 3D animatie te bekijken

De schneeploog

De eulderen onder ons kent nog wal de tied, det de gemeentekeerls stonden te vernikkelen achter op die vrachtwagens, diet de weagen dooi mosten holden. Hoe lange is het geleden det de meesten van ons nog op klumpkes noar de schoole gungen?

Noe vroag ie netuurlijk of, wat hef det noe met mekaar te maken. Eigelijk alles. An het begin van de veurige eeuw hadden wie in Battem, de klompenmakerieje van Mannes Klein Velderman. Doar worden in 1907 zönneke Herman gebooren. Noa de leagere schoole gung hij noar de ambachtschoole in Deaventer, um deur te leren veur smid. Hij begun ziene loopbaane bie Dokter in Battum. Hij greuiden op as nen echte Battemse jonge en natuurlijk voetbalden hij bie ABS. Ziene groote leefde kwam hij tegen in de OAD- busse. Ôk zie was ne Battemse, uut ne familie van mollenvangers, Johanna Bijma. Eur oolders waren in de dartiger joaren van Freesland in Bathmen goan wonnen. Doar worden getrouwd en het jonge paar trek bie de olde leu in. Noa diverse baantjes kump disse Battemse jonge, Herman Klein Velderman, te warken bie smid Stokkers in Hoolten. Duur det ze doar ziene loonsverhooging introkken, begun hij in Hoolten zelf ne smederieje. Het begin van ne nieje zaak was gebooren. As smid van de Kol greuiden zien éénmansbedrief uut. Hij verkocht de klompen van zien vader en bienoa heel Hoolten leup op Battemse klompe. In de joaren, noar de oorlog leverden hij as smid, de eerste schneeploog an de gemeente Hoolten. Het is het begin van ne tied, woerin dissen Battemsen telg de grötste fabrikant van schneepleuge zol worden. Wie kent ze neet, internationaal bekend, de pleuge van Nido. Disse heele geschiedenis is vaste gelegd in een book “Smeden als het ijzer heet is”. Het lig al een paar wekke te koop bie de bookhandel in Hoolten. Vieftien Euro, um de pries hoof ie het neet te loaten. Bienoa tweihonderd bladzieden, met ondermeer, mooie Battemse verhalen en foto’s oaver dissen Battemmer, groot geworden deur de schneepleuge.