De weereld is kàànt kepot

Ie heurt ’t oen vaa zô wier zegg’n. Ie betrapt er oe op, dàj’ doar hoe langer hoe meer op goat liek’n. In Amsterdam doar gebuurd ‘t. Jonge lèu protestèèrt tèèg’n het geweeld in Gaza. Op zich is doar wat vuur te zegg’n, mar um doar vuur àànderhalf miljoen schade an te richt’n, det geet te veer.

En um dan te ôônderhààndeln met die lèu diet tèèg’noaver oe zit met deuke vuur ’t gezichte, doar klopt à hèèmoa niks van en löst niks op. Anpakk’n die handel, duudelijk wèèr wat kan en neet kan, ààns ettert het mà vedan. Wat ne tèèngslag hè, Joost môch neet met doon met het zangfestijn en woerumme neet? Hij hef schienbaar te heftig reagèèrt op de cameravrouwe. Zô arg zal ‘t wà neet wèèr ’n ewes, ààns hadd’n z’m neet loat’n goan. Woerumme gen duudelijkhèid, noe ettert ’t nog tied’n duur en van het festival hôôl ie ne naare smaak in de môônd. Joost is kloar met alle camera’s. Hij is met een privé vliegtuugje noar huus hen e vlèuig’n en zien versje dut ’t het beste vanàmoa. Uuropapa, an alle kàànt’n blif de onröste. Honderduuzenden möt vlucht’n vuur oorlog en geweeld in Gaza. Ôk in Oekraïne kômt de vluchteling’nstroom’n wier op gàànk. Ie hôôlt oen harte vaste. En hier in Nederlàànd kômt wiej der mà neet uut. Disse wekke möt de kôôgel duur de karke. Zô neet, astebleef stopt er met, het hef noe lange genog eduurt. Duudelijkhèid doar zitte wiej op te wacht’n. Legt astebleef de kaart’n op toafel. Het optreed’n van de informateurs, hoe vermakelijk ôk, is môôi genog ewes. Duudelijkhèid, an of van, het is genog. Ruslàànd krig ne niej’n minister van defensie. Het is te hopp’n det ze den rampzaligen anval neet duur zet. Woenneer zeg e wiej met zien all’n tèèg’n Poetin det ’t môôi is ewes. Het ettert mà vedan en den ôôld’n kan wal is geliek krieg’n, de weereld is kàànt kepot.