Det kan der ôk nog wà biej

De Poasvèur’n hebt ebràànd. Gowed hef ewunn’n of verleuirne. Loaw we van ’t èèrste uutgoan. Dan köw we àmoa trugge kiek’n op onvergettelijke Poasdaag’n. Buss’n vol supporters vanuut Dèimter, op weg noar de Kuip. Winkels vol met Gowed bier.

Ôk vuur de tillevisie was ’t geniet’n of neet. De henrèize was à zôônder meer een fees. De terugrèize kon dit allèène mar oavertreff’n biej nen oaverwinning van de rôôd gell’n. Wat ’t ôk is ewörd’n, het was à zôônder meer ne prestatie um in de finale trechte te kômm’n. Àj’ dit stukske ôônder ôôg’n hebt, wèèt wiej meer. Volendam kluurt oranje, zie promovèèrt noar de eredivisie. Op noar Koningsdag, de herdenking en de bevrijding. Geniet er van. Gelukkig is ter de leste wekke een betje rèèng’n evöll’n. Het grös schöt noar boam’n en de blaa scheet uut de knöppe. De lèu begint wier in ’n tuin te wreut’n. Het is vuurjoar. Ie markt ‘t. Rôônkende motoor’n, zie bint van stal ehaalt. Ie zeet wier fietsers en wandelaars langs de wèège goan. Battem is nog altied môôi versierd. Vrèè Vriejhèid, noe à tachtig joar. Èèm’n de naarighèid an de kàànte, èèm’n de wereld buut’nsluut’n. Jammer genog lukt det neet altied. Het kabinet zit er nog, wat zal ’t ôôns breng’n? De vuurjoarsnota is geboor’n. De môôie dinge hebt ze ôôns al uutgebreid vuur eheul’n. Het zoer kump ter pas later achteran. Loat het langs oe hen goan. Op noar de Pinkstern. De pinksterbloom’n stoat noe al volop in bleui in de wèire. Zelf duuk ie nog mar is èèm’n de tuin in, want wie in zien eeg’n tuintje wiedt, zut het onkruud biej ’n àànder neet. ’S Oamds möj’ der wier an gelèum’n, Amerika en China bloast tèèng’n mekaar an. Israel wèèt neet van ophôôld’n. Gaza is compleet van de kaarte en Hamas, wat een ellende. Loaw we hopp’n dàj’ een goeie Poas’n hebt ehad en Gowed hef ewunn’n, ààns kan det er ôk nog wa biej.