Duustere daage

Wie weet er weer van, supporters scheeldt ne donkeren voetballer verrot. Een dag of wat later wordt ne blanke jongen in mekaar etrapt. De duustere daage bint begunnen. Ne busse vol met vluchtelingen komt noar het meest racistische land van de wereld. Wat is ter toch an de hand?Wie moet ie de zwarte piet noe toespöllen? Oh nee det kan ook niet meer. De voetbalclubs loat zeen, det ze der kloar met bint. Een good begin, maar dan ôk woord hôôlen en bie iedere buutensporige scheeldpertieje, de schoone uut en noar de kleedkamer. Ankommenden zundag begint de advent en denke wie met zien allen an vrede op aarde. Mooie gedachten, maar doar blif het bie. Mooie gedachten, met zien allen um de kribbe, de kachel, of wat dan ôk, terugge kieken op het ofgeloopen joar. Wat brach wille en wat brach ons vedreet. Genieten van femilie, net doon of de klokke stille steet. Duustere daage, doot er wat met. Haalt Sunterkloas en Pieterbaas in de huuskamer. Zingt met de kleintjes al die mooie Sunterkloasversjes, met de lekkerste speculaas van heel Nederland. Doot met an de herdertjestocht of bezeukt één van de zovölle kerstmarkten. Geniet van kerstzang of midwinterhoorns, diet schreeuwt um lech en een niej begin. Haalt de karsboom noar binnen, kiekt verwondert noar de verlichting buuten. Wie weet, de eerste sneeuw, of toch weer, druilerige duustere daage. December, het is zunne warme femiliemoand, doar kan de kôôle buutenwereld niet tegenop. Al die zorgen van stikstof en weet ik völle wat. Loat de stoomboot, het vliegtuug en de auto op de kökken. Pakt de benenwagen of de fietse. Gen beperking ie magt honderd per uur. Wie moet zuunig weazen op ons aardbolleke, maar det heult bie de grens van Nederland niet op. Duustere daage, maar noa mirrewinter wordt het alle daagen wier lechter.