Plan De Brink
Klik hier om de 3D animatie te bekijken

Eaven met Rakker noar de bakker

In gedachten zit ie in de mooie nieje wachtkamer. Gelukkig is de sfeer van het geheel geble-ven. Nieje gebouwen achter olde gevels. Gedeuldig wacht ie met oen hundje tutdet ie an de beurte bint. De herinneringen komt vanzelf boaven drieven. Ie zeet Jootje achter de hooge teunbanke bie de bakpanne. Onwillekuurig loop ie vedan noar de wonkamer, wachtend op de karbonade met patat. ’N old’n Hendrik kump nog eaven bieproaten. Hij zut er uut as ne schneepoppe en ruk noar vars gebakken brood. Het mel stuf hem deur de heure as e der met ziene groote bakkershande deurhen geet. Jan kik met één ooge um de deure. Hij heult de boel scharp in de gaten. As ie rotzooi maakt, bin ie an de buurte. Wie ligt plat as e weer ne schuunen bak verteld hef. De gedachten vleegt alle kanten op. Wim, de man van Jootje bakt oliebollen. Hij glimt nog harder as ziene bollen, boaven die heete öllie. Mooder Diene trapt op nen onmeunige groote bakfietse deur het buutengebied. Völs te zwoar wark. In het mulle zand kump ze te vallen en de stoetens vleegt deur de loch. Fietse tegen de boom, stoete der in en vedan maar weer. Vaste prik, eaven noa het dansen een patatje bie Hendrik van de Bakker. Alles kon der, zelfs de rollade van Jootje en Wim hebt wie der ooit noar binnen gewarkt. Generaties lang bint de jongeleu van doaruut opgehaald of noar huus gebracht. De leste joaren was ie der vaake met de kleintjes veur een ijsje. Heinig an werd het stiller en stiller. Noe is ter ne nieje bestemming. Ne dokterspraktijk veur kleindieren. Rakker is an de buurte. Hé heur ie doar noe die bezundere winkelbelle en kump Gerritje doar an, um oe veerder te helpen? Ie raakt er van in de warre. Zo geniet ie van de nieje bestemming in dit olde bakkerspand. Kompelementen an de leu diet hier de dienstverlening deur zet. Een mooi stukje Battem met ne rieke geschiedenis is beholden gebleven.