Eaven noar de buren

Dit keer neet in westelijke richting, maar richting het Oosten. Woarumme, zul ie oe ofvroagen. Op zundag hooft wie neet, want wie hebt zelf de winkels hier los. Nee, det is ook niet de bedoeling. Ankommenden zoaterdagmiddag is doar ne groten zommer-carnavals optocht. Vanof vier uur trekt, met feestelijke muziek en lawaai, ne kluurige stoet deur de stroaten van Holten.

Heerlijk um eaven onder te duuken in de gezelligheid van het harte van Holten, onder het genot van een hapje en een drankje. Lekker in de korte bokse en neet met ne dikken winterjas an. Het beste kun ie op de fietse goan en dan natuurlijk binnendeur oaver Loo. Oaver de Looweg, in de richting van de Hof te Battem, bie Kuut deur Willeminksdreij en vedan, langs ondermeer “Wiltsangh” noar Nagelvoorts drei,j in de richting van Loo. As ie oe de tied gunt maak ie hen en wierumme ne slinger oaver de Menopsweg. Het is doar zo schilderachtig mooi. De meeste Battummers kent het neet. Noa Loo pak ie den Olden Diek, deur het Venne langs het zwembad in de richting van de Olde Bekke, doar woar Kleine Appie joarenlang de Sallandse Landweerd in de gaten heul. An de rechter kante lig het Snatergat. Doar woar de Darperdiek begint, bin ie in op de goeie weg. Veural det stuk an de Battemse kante is onmeunig mooi en mocht ie Holten niet bereiken, gen ramp, ie kunt altied onderweg een stop maken bie restaurant Loo, veur een hapje of een drankje. Of goat anders eaven kieken bie de Pothaar. Altied een prachtig uitje en ie leert zo völle oaver ons Olde Battum. Trouwens op Pinkstermoandag is doar volop gezelligheid met harmonicamuziek. Kortumme ie hooft oe neet te vervelen. Mocht ie via de Darperdiek en Loarnseweg op zoaterdag toch verzeild raken bie de buren. Allemoal völle wille, fijne Pinksterdagen en op noar de zommer.